aaKHiri din

yahāñ ye sab log apnī apnī gavāhiyāñ le ke yuuñ khaḌe haiñ

kisī ke hoñToñ pe barhamī hai

kisī kī āñkhoñ meñ bebasī hai

tamām māthe kitāb jaise

varaq varaq jis pe zindagī ke tamām lamhe likhe hue haiñ

har ek chehra baḌī ḳhamoshī se

saare chehroñ kī lauh-e-mastūr paḌh rahā hai

tamām chup-chāp sochte haiñ

ye aaj kā din bhī kaisā din hai

jo munjamid ho ke ek nuqte pe ruk gayā hai

ajiib din hai jo apnī pahchān kho chukā hai

vo sab ta.āruf jo mo'atabar the

vahī to ab ġhair-mo'tabar haiñ

na koī tauqīr-e-rang-o-bū kī

na koī bū-bās ab lahū kī

badan ke jitne bhī lāhiqe the

vo sab ke sab ġhair-mo'tabar haiñ

shanāsā chehre bhī nā-shanāsā

ki jaise koī kisī ko pahchāntā nahīñ hai

farishte āsūda-chashm aise ki jaise sadiyoñ se

aaj ke din ke muntazir the

vo sab kī fard-e-hisāb le kar

safoñ meñ yuuñ musta.id khaḌe haiñ

ki jaise saare hisāb-dāñ hoñ

magar ye fard-e-hisāb kaisī

karoḌoñ sāloñ ke baad saarī zabāñ ke anchhar badal chuke haiñ

purāne lafzoñ kī keñchulī bhī kabhī kī farsūda ho chukī hai

tamām lahje jo mo'atabar the kabhī ke tahlīl ho chuke haiñ

vo kal jo mafhūm mustanad the vo aaj tabdīl ho chuke haiñ

yahan ye sab log apni apni gawahiyan le ke yun khaDe hain

kisi ke honTon pe barhami hai

kisi ki aankhon mein bebasi hai

tamam mathe kitab jaise

waraq waraq jis pe zindagi ke tamam lamhe likhe hue hain

har ek chehra baDi KHamoshi se

sare chehron ki lauh-e-mastur paDh raha hai

tamam chup-chap sochte hain

ye aaj ka din bhi kaisa din hai

jo munjamid ho ke ek nuqte pe ruk gaya hai

ajib din hai jo apni pahchan kho chuka hai

wo sab taaruf jo mo'atabar the

wahi to ab ghair-mo'tabar hain

na koi tauqir-e-rang-o-bu ki

na koi bu-bas ab lahu ki

badan ke jitne bhi lahiqe the

wo sab ke sab ghair-mo'tabar hain

shanasa chehre bhi na-shanasa

ki jaise koi kisi ko pahchanta nahin hai

farishte aasuda-chashm aise ki jaise sadiyon se

aaj ke din ke muntazir the

wo sab ki fard-e-hisab le kar

safon mein yun mustaid khaDe hain

ki jaise sare hisab-dan hon

magar ye fard-e-hisab kaisi

karoDon salon ke baad sari zaban ke anchhar badal chuke hain

purane lafzon ki kenchuli bhi kabhi ki farsuda ho chuki hai

tamam lahje jo mo'atabar the kabhi ke tahlil ho chuke hain

wo kal jo mafhum mustanad the wo aaj tabdil ho chuke hain