aaKHiri nazm

biivī mujh se kahtī hai

saarā din leTe rahne

aur nazmeñ likhne se

ghar kaise chalegā

nazmeñ roTiyāñ to nahīñ

ki bachchoñ kā peT bhar sakeñ

tum to apnā peT

shā.erī kī talvār se kaaT kar

mustaqbil kī khūñTī se laTkā chuke ho

lekin hamāre peT itne shā.irāna nahīñ

sochtā huuñ

biivī Thiik kahtī hai

nazmeñ to ġhaib se utar aatī haiñ

lekin roTiyāñ ġhaib ke tannūr meñ nahīñ paktīñ

vaise bhī shā.erī ko zinda rakhne ke liye

peT par roTī bhāñdhnī zarūrī hai

lekin maiñ use darḳhvāst karūñgā

vo mujhe ek nazm aur likh lene de

āḳhirī nazm

jis meñ aane vaalī kal ke liye

koī tārīf nahīñ hogī

jis meñ guzar jaane vaalī kal ke liye

koī pachhtāvā nahīñ hogā

jis meñ aaj ke kisī dukh kā

mātam nahīñ hogā

har lihāz se mukammal nazm

biwi mujh se kahti hai

sara din leTe rahne

aur nazmen likhne se

ghar kaise chalega

nazmen roTiyan to nahin

ki bachchon ka peT bhar saken

tum to apna peT

shaeri ki talwar se kaT kar

mustaqbil ki khunTi se laTka chuke ho

lekin hamare peT itne shairana nahin

sochta hun

biwi Thik kahti hai

nazmen to ghaib se utar aati hain

lekin roTiyan ghaib ke tannur mein nahin paktin

waise bhi shaeri ko zinda rakhne ke liye

peT par roTi bhandhni zaruri hai

lekin main use darKHwast karunga

wo mujhe ek nazm aur likh lene de

aaKHiri nazm

jis mein aane wali kal ke liye

koi tarif nahin hogi

jis mein guzar jaane wali kal ke liye

koi pachhtawa nahin hoga

jis mein aaj ke kisi dukh ka

matam nahin hoga

har lihaz se mukammal nazm