aaKHiri paDaw

shāyad merī zamīn

apne safar ke āḳhirī paḌāv se aage nikal chukī hai

manzil par jalte hue falak-bos alaav kī hiddat kuchh itnī tez hai

ki daraḳhtoñ ke jaḌoñ se le kar

shāḳhoñ ke saroñ par aane vaalā baur tak

pasīne aur garmī se haañp rahā hai

vaqt kī kaThalī meñ ubalte hue hālāt ke saath

ab ke kisī aql-mand ne havā ke haath par rakkhe hue

tamām mausam bhī uThā kar Daal diye haiñ

mujhe yaad hai ki shu.ūr kī pahlī sīḌhiyoñ par paañv rakhte hī

kis asbiyyatī lamhe ne

mere kānoñ meñ sargoshī kī thī

ki tum apne baap kī paidā.ish se bhī bahut pahle girvī rakh diye ga.e the

maiñ us din se le kar aaj tak bahī-khātoñ ke

qarz vaale ḳhāne se nahīñ nikal sakā

aur mere hāthoñ meñ itnī be-iḳhtiyārī bhar dī ga.ī hai

ki mere ghar ke darvāze kī chābiyāñ har roz phisaltī huī

merī uñglī kī āḳhirī por par aa jaatī haiñ

aur maiñ dahshatnāk āñkhoñ se ḳhalā meñ dekhne lagtā huuñ

ki jaise duur ġhulāmī ke siyāh manzar

aadhe se zyāda darsī kitāboñ se bāhar nikal aa.e haiñ

ḳhauf ke lambe nāḳhunoñ ne ḳhāk-zādoñ ke badan kī miTTī aise khurach dī hai

jaise makānoñ kī dīvāroñ kā kachchā rañg

tez bārishoñ meñ utar kar nāliyoñ meñ bah jaatā hai

gharoñ mohalloñ aur saḌkoñ par nādīda dīvāreñ itnī ūñchī uThā dī ga.ī haiñ

ki ham ikaTThe rahte hue ek saath chalte hue bhī

ek dūsre ko dekh nahīñ sakte

aur kyā kahūñ ki is saal dekhne sunñe aur bolne par bhī namkīñ lagā diyā gayā

jaise ham sab apne apne badan meñ tanhā kar ke maar diye jā.eñge

vo ahd zyāda duur nahīñ

jab hameñ koī nasl mohanjodḌo aur haḌappā kī tarah daryāft karegī

soch rahā huuñ ki hameñ kitne fiT gahrā khod kar nikālā jā.egā

aur phir museum meñ rakhī huī shīshe kī almāriyoñ meñ

purānī haDDiyoñ ke nīche ye tahrīr jab koī sayyāh rakh kar paḌhegā

ki ye is daur kā insān thā jab taraqqī apne nuqta uruuj se bhī aage thī

magar ta.alīm-yāfta is ma.āshre ke log ġhāroñ meñ rahne vāloñ se zyāda tahzīb-yāfta the

ye ek shā.er thā

jo ehsās kī qabr meñ

apnī maut se pahle dafn kar diyā gayā

shayad meri zamin

apne safar ke aaKHiri paDaw se aage nikal chuki hai

manzil par jalte hue falak-bos alaw ki hiddat kuchh itni tez hai

ki daraKHton ke jaDon se le kar

shaKHon ke saron par aane wala baur tak

pasine aur garmi se hanp raha hai

waqt ki kaThali mein ubalte hue haalat ke sath

ab ke kisi aql-mand ne hawa ke hath par rakkhe hue

tamam mausam bhi uTha kar Dal diye hain

mujhe yaad hai ki shuur ki pahli siDhiyon par panw rakhte hi

kis asbiyyati lamhe ne

mere kanon mein sargoshi ki thi

ki tum apne bap ki paidaish se bhi bahut pahle girwi rakh diye gae the

main us din se le kar aaj tak bahi-khaton ke

qarz wale KHane se nahin nikal saka

aur mere hathon mein itni be-iKHtiyari bhar di gai hai

ki mere ghar ke darwaze ki chabiyan har roz phisalti hui

meri ungli ki aaKHiri por par aa jati hain

aur main dahshatnak aankhon se KHala mein dekhne lagta hun

ki jaise dur ghulami ke siyah manzar

aadhe se zyaada darsi kitabon se bahar nikal aae hain

KHauf ke lambe naKHunon ne KHak-zadon ke badan ki miTTi aise khurach di hai

jaise makanon ki diwaron ka kachcha rang

tez barishon mein utar kar naliyon mein bah jata hai

gharon mohallon aur saDkon par nadida diwaren itni unchi uTha di gai hain

ki hum ikaTThe rahte hue ek sath chalte hue bhi

ek dusre ko dekh nahin sakte

aur kya kahun ki is sal dekhne sunne aur bolne par bhi namkin laga diya gaya

jaise hum sab apne apne badan mein tanha kar ke mar diye jaenge

wo ahd zyaada dur nahin

jab hamein koi nasl mohanjodDo aur haDappa ki tarah daryaft karegi

soch raha hun ki hamein kitne fiT gahra khod kar nikala jaega

aur phir museum mein rakhi hui shishe ki almariyon mein

purani haDDiyon ke niche ye tahrir jab koi sayyah rakh kar paDhega

ki ye is daur ka insan tha jab taraqqi apne nuqta uruj se bhi aage thi

magar talim-yafta is maashre ke log ghaaron mein rahne walon se zyaada tahzib-yafta the

ye ek shaer tha

jo ehsas ki qabr mein

apni maut se pahle dafn kar diya gaya