aaKHiri rae

kal raat vo āsmānoñ se utrā bahut ḳhush huā

bahut ḳhush huā jaise gahre samundar

ġhazabnākiyoñ meñ uchhalte haiñ yā āsmāñ par farishte

qubūl-e-ibādat pe masrūr hote haiñ

us ne kahā maiñ ne jo kuchh kahā thā vo puurā huā

jo maiñ dekhtā thā vo maiñ dekhtā thā

jo vo dekhtā thā vo shīshe meñ ḳhud us kā apnā hī chehra thā

zāhir na maḳhfī na vāzeh

faqat ek mumkin ki hotā na hotā

us ne ye dekh kar

apnī har kāmyābī kī fihrist tartīb dī aur

āḳhir meñ likkhā zamīn par ḳhudā kī tavaqqo

na puurī huī thī na puurī huī hai

jise ham ne aadam kahā thā vo miTTī kā be-kār be-asl dhokā thā

dhokā hī sābit huā

us se kuchh na huā

fazāoñ meñ niilī havāoñ meñ dozaḳh meñ jannat meñ

aqvām-e-ālam kī mahfil-sarāoñ meñ

us be-navā kā tamasḳhur uḌā

jise maiñ ne bar-vaqt rokā thā

kal raat wo aasmanon se utra bahut KHush hua

bahut KHush hua jaise gahre samundar

ghazabnakiyon mein uchhalte hain ya aasman par farishte

qubul-e-ibaadat pe masrur hote hain

us ne kaha main ne jo kuchh kaha tha wo pura hua

jo main dekhta tha wo main dekhta tha

jo wo dekhta tha wo shishe mein KHud us ka apna hi chehra tha

zahir na maKHfi na wazeh

faqat ek mumkin ki hota na hota

us ne ye dekh kar

apni har kaamyabi ki fihrist tartib di aur

aaKHir mein likkha zamin par KHuda ki tawaqqo

na puri hui thi na puri hui hai

jise hum ne aadam kaha tha wo miTTi ka be-kar be-asl dhoka tha

dhoka hi sabit hua

us se kuchh na hua

fazaon mein nili hawaon mein dozaKH mein jannat mein

aqwam-e-alam ki mahfil-saraon mein

us be-nawa ka tamasKHur uDa

jise main ne bar-waqt roka tha