aaKHiri raat

mat bujhā dil-e-nādāñ

sogvār sham'oñ ko

ab bhī ġham ke māroñ kī

aadhī raat baaqī hai

ḳhvāb kī tahoñ meñ ab

chhup ga.e haiñ jā jā kar

zindagī ke saudāgar

hai jahān-e-be-pāyāñ

ek qarya-e-vīrāñ

aur merī ye dhartī

karvaTeñ badaltī hai

jaise dard ke maare

koī kuchh na kah paa.e

chauñk chauñk uThtī hai

rāste kī ḳhāmoshī

maut jaise kartī ho

zindagī se sargoshī

maiñ ne ashk bo.e the

jin fasurda āñkhoñ meñ

un se ḳhuun ristā hai

un se aag bahtī hai

mere sāmne aa kar

naach naach uThtī haiñ

merī apnī tasvīreñ

kitnī baar jab maiñ ne

zindagī luTā.ī hai

aur kisī kī chāhat meñ

zalzale se aa.e haiñ

āsmān TuuTā hai

jaan par ban aa.ī hai

shal hue haiñ ye shāne

thak ga.ī haiñ āshā.eñ

lekin aaj bhī hamdam

ye udaas darvāze

shāhrāh kī jānib

jaise takte rahte haiñ

dekh in darīchoñ par

koī buuñd phir Tapkī

niiñd ke daraḳhtoñ ko

koī phir hilātā hai

aur jaise rah rah kar

mere kaan bajte haiñ

maut ke qadam kī chaap

merī nā-tamām ulfat

aasrā dilātī hai

aaj jaag kar kaaTo

sā'at-e-fasurda ko

aaj koī aa.egā

aaj koī aa.egā

mat bujha dil-e-nadan

sogwar sham'on ko

ab bhi gham ke maron ki

aadhi raat baqi hai

KHwab ki tahon mein ab

chhup gae hain ja ja kar

zindagi ke saudagar

hai jahan-e-be-payan

ek qarya-e-viran

aur meri ye dharti

karwaTen badalti hai

jaise dard ke mare

koi kuchh na kah pae

chaunk chaunk uThti hai

raste ki KHamoshi

maut jaise karti ho

zindagi se sargoshi

main ne ashk boe the

jin fasurda aankhon mein

un se KHun rista hai

un se aag bahti hai

mere samne aa kar

nach nach uThti hain

meri apni taswiren

kitni bar jab main ne

zindagi luTai hai

aur kisi ki chahat mein

zalzale se aae hain

aasman TuTa hai

jaan par ban aai hai

shal hue hain ye shane

thak gai hain aashaen

lekin aaj bhi hamdam

ye udas darwaze

shahrah ki jaanib

jaise takte rahte hain

dekh in darichon par

koi bund phir Tapki

nind ke daraKHton ko

koi phir hilata hai

aur jaise rah rah kar

mere kan bajte hain

maut ke qadam ki chap

meri na-tamam ulfat

aasra dilati hai

aaj jag kar kaTo

sa'at-e-fasurda ko

aaj koi aaega

aaj koi aaega