aaKHiri shab

kurra-e-arz pe insān kī ye āḳhirī shab

roz-e-avval ke ujāle kī tarah raushan hai

āsmānoñ kī taraf aag ke sho.ale haiñ davāñ

kaun jaane inhī rastoñ se farishte hoñ ravāñ

arz se us ke ḳhalīfa ko uThāne ke liye

us ko apne vatan-e-asl meñ laane ke liye

is liye din ke ujāle kī tarah raushan hai

afv kī va.ada-o-paimān kī ye āḳhirī shab

kurra-e-arz pe insān kī ye āḳhirī shab

aur ḳhudāyān-e-zamīñ ne bhī navāzā us ko

ilm-o-tahzīb-o-tamaddun se sañvārā us ko

mah-o-parvīñ kā bhī yuuñ us ko sikhāyā hai shikār

ki ḳhudāvand-e-zamīñ hone lagā us kā shumār

aur iblīs ne us ilm ko azmat de kar

apnī taḳhrīb ke aadam ko dikhā.e jauhar

aur phir ahl-e-siyāsat ke haiñ ehsān bahut

aish-e-insāñ ke jinhoñ ne kiye sāmān bahut

kī bahut chāragarī ahl-e-siyāsat ne magar

pūchheñ in chāragaroñ se vo bitā.e kyoñ kar

apne har dard ke darmān kī ye āḳhirī shab

kurra-e-arz pe insān kī ye āḳhirī shab

kurra-e-arz pe insan ki ye aaKHiri shab

roz-e-awwal ke ujale ki tarah raushan hai

aasmanon ki taraf aag ke shoale hain dawan

kaun jaane inhi raston se farishte hon rawan

arz se us ke KHalifa ko uThane ke liye

us ko apne watan-e-asl mein lane ke liye

is liye din ke ujale ki tarah raushan hai

afw ki wada-o-paiman ki ye aaKHiri shab

kurra-e-arz pe insan ki ye aaKHiri shab

aur KHudayan-e-zamin ne bhi nawaza us ko

ilm-o-tahzib-o-tamaddun se sanwara us ko

mah-o-parwin ka bhi yun us ko sikhaya hai shikar

ki KHudawand-e-zamin hone laga us ka shumar

aur iblis ne us ilm ko azmat de kar

apni taKHrib ke aadam ko dikhae jauhar

aur phir ahl-e-siyasat ke hain ehsan bahut

aish-e-insan ke jinhon ne kiye saman bahut

ki bahut chaaragari ahl-e-siyasat ne magar

puchhen in chaaragaron se wo bitae kyon kar

apne har dard ke darman ki ye aaKHiri shab

kurra-e-arz pe insan ki ye aaKHiri shab