aaKHri lecture

ye tum sab

ki jin ke saroñ meñ javānī kā ḳhuuñ lahlahātā hai

mujh se rasīd apnī mehnat kī bhī lete jaao

mohabbat ke baare meñ jo bhī kisī ne batāyā hai

puurī haqīqat nahīñ

kyūñki chāhat rivāyat nahīñ

tajraba hai

haqīqat meñ har aadmī mohtaram hai

vo ḳhud us kī jab tak na tardīd kar de

ye pahle bhī maiñ ne kahā thā

tumhāre laboñ se jo kānoñ ko pahuñche

vo harf ism-e-āzam ho

dekho vahī

jis meñ kal kī bashārat

hidāyat har ik ḳhair kī

taaza ehsās kī raushnī ho

jo kānoñ meñ utre

tum us meñ se amrit nithāro

ki amrit meñ dil ruuh aur zehn kī

tiis bīmāriyoñ kī shifā hai

zabāñ par vo tāsīr rakhnā

ki jis se zamāne ko ḳhud apnī pahchān ho

apne har ilm ko aap hī dekhnā aur apnī zabāñ se hī paḌhnā

zamāne ko chhūnā

ki har nasl ne jo haqā.eq tarāshe

vo apne hī hāthoñ ghaḌe haiñ

ki har ahd ne aag ko chhū ke hī aag maanā

ye tum bhī karoge

ye sab tum bhī karnā

kitāboñ ko bas sūñghnā chhoḌ denā

ye kullī sadāqat nahīñ haiñ

tumhāre zamāne se pahle ke likhe hue nādir aurāq

kal kī har ik pesh-bīnī se aarī haiñ

in sab kitāboñ ke pahle varaq

sirf is vāste

ḳhālī rakkhe ga.e haiñ

ki tum in pe apne zamāne kī sachchā.iyāñ likh ke jaao

ham aisoñ kī ḳhātir

jinheñ kal tumhārā likhā paḌh ke phir yaad karnā hai

aate huoñ ko sunānā hai

ye tum sab

ki jin ke saron mein jawani ka KHun lahlahata hai

mujh se rasid apni mehnat ki bhi lete jao

mohabbat ke bare mein jo bhi kisi ne bataya hai

puri haqiqat nahin

kyunki chahat riwayat nahin

tajraba hai

haqiqat mein har aadmi mohtaram hai

wo KHud us ki jab tak na tardid kar de

ye pahle bhi main ne kaha tha

tumhaare labon se jo kanon ko pahunche

wo harf ism-e-azam ho

dekho wahi

jis mein kal ki bashaarat

hidayat har ek KHair ki

taza ehsas ki raushni ho

jo kanon mein utre

tum us mein se amrit nithaaro

ki amrit mein dil ruh aur zehn ki

tis bimariyon ki shifa hai

zaban par wo tasir rakhna

ki jis se zamane ko KHud apni pahchan ho

apne har ilm ko aap hi dekhna aur apni zaban se hi paDhna

zamane ko chhuna

ki har nasl ne jo haqaeq tarashe

wo apne hi hathon ghaDe hain

ki har ahd ne aag ko chhu ke hi aag mana

ye tum bhi karoge

ye sab tum bhi karna

kitabon ko bas sunghna chhoD dena

ye kulli sadaqat nahin hain

tumhaare zamane se pahle ke likhe hue nadir auraq

kal ki har ek pesh-bini se aari hain

in sab kitabon ke pahle waraq

sirf is waste

KHali rakkhe gae hain

ki tum in pe apne zamane ki sachchaiyan likh ke jao

hum aison ki KHatir

jinhen kal tumhaara likha paDh ke phir yaad karna hai

aate huon ko sunana hai