aaKHri raat

āḳhirī raat hai december kī

ārzuoñ kī saj ga.ī hai barāt

sāl-e-nau kī bas āmad-āmad hai

le ke aa.egā jaane kyā sauġhāt

tīra-o-tār mahfil-e-shab meñ

nuur hī nuur aaj mehmāñ hai

dīdanī hai ye jashn kā ‘ālam

anjuman anjuman charāġhāñ hai

dafn maazī meñ saare ġham kar ke

ḳhair-maqdam ke giit gaate haiñ

ye junūñ-ḳhez sarḳhushī kā samāñ

gul-e-ummīd muskurāte haiñ

sāl-e-nau kī naved le le kar

muddatoñ se ye raat aatī hai

lamha lamha pighaltā jaatā hai

raat jaatī hai baat jaatī hai

har qadam par ḳhizāñ bhī ghaat meñ hai

kuchh ḳhabar bhī hai jashn-e-gul vaalo

manzileñ kitnī ho chukī haiñ tai

muḌ ke rāhoñ pe ik nazar Daalo

umr-e-rafta kā sang-e-mīl ye shab

sub.h kī shakl jab dikhā.egī

maut kī rahguzar pe ek qadam

zindagī aur aage jā.egī

aaKHiri raat hai december ki

aarzuon ki saj gai hai baraat

sal-e-nau ki bas aamad-amad hai

le ke aaega jaane kya saughat

tira-o-tar mahfil-e-shab mein

nur hi nur aaj mehman hai

didani hai ye jashn ka ‘alam

anjuman anjuman charaghan hai

dafn mazi mein sare gham kar ke

KHair-maqdam ke git gate hain

ye junun-KHez sarKHushi ka saman

gul-e-ummid muskuraate hain

sal-e-nau ki nawed le le kar

muddaton se ye raat aati hai

lamha lamha pighalta jata hai

raat jati hai baat jati hai

har qadam par KHizan bhi ghat mein hai

kuchh KHabar bhi hai jashn-e-gul walo

manzilen kitni ho chuki hain tai

muD ke rahon pe ek nazar Dalo

umr-e-rafta ka sang-e-mil ye shab

subh ki shakl jab dikhaegi

maut ki rahguzar pe ek qadam

zindagi aur aage jaegi