aalam-e-tasawwur

phir tasavvur pe chhā ga.ī hai tū

phir mujhe dhyān aa rahā hai tirā

phir baḌhā jā rahā hai josh-e-junūñ

phir huā jā rahā huuñ dīvāna

mahviyat sī hai be-ḳhudī sī hai

dil meñ phir bas ga.ī tirī tasvīr

dekh kar dekhtā hī jaatā huuñ

rūh-e-pur-nūr qalb-e-pur-tanvīr

husn-e-nazzāra hai hayāt-afroz

dil-nashīñ hai ye ḳhvāb kī duniyā

aa ga.ī tū mujassam āñkhoñ meñ

bas ga.ī hai koī na.ī duniyā

reshmī sabz rang kī saaḌī

jo sarak aa.ī sar se kandhoñ par

zīnat-e-husn-o-zeb-e-ārā.ish

tār-tār us kā hai nazar-parvar

le rahā hai balā.eñ aariz kī

vo tire kaan kā hasīn bundā

kis qadar hai ye mast-e-lazzat-e-qurb

jhūmtā hai surūr meñ kaisā

ġham hai zauq-e-nazar nazāre meñ

kis tasavvur meñ kho gayā huuñ maiñ

ab to ye bhī mujhe nahīñ ma.alūm

jāgtā huuñ ki so gayā huuñ maiñ

phir tasawwur pe chha gai hai tu

phir mujhe dhyan aa raha hai tera

phir baDha ja raha hai josh-e-junun

phir hua ja raha hun diwana

mahwiyat si hai be-KHudi si hai

dil mein phir bas gai teri taswir

dekh kar dekhta hi jata hun

ruh-e-pur-nur qalb-e-pur-tanwir

husn-e-nazzara hai hayat-afroz

dil-nashin hai ye KHwab ki duniya

aa gai tu mujassam aankhon mein

bas gai hai koi nai duniya

reshmi sabz rang ki saDi

jo sarak aai sar se kandhon par

zinat-e-husn-o-zeb-e-araish

tar-tar us ka hai nazar-parwar

le raha hai balaen aariz ki

wo tere kan ka hasin bunda

kis qadar hai ye mast-e-lazzat-e-qurb

jhumta hai surur mein kaisa

gham hai zauq-e-nazar nazare mein

kis tasawwur mein kho gaya hun main

ab to ye bhi mujhe nahin malum

jagta hun ki so gaya hun main