aalamon ko ban bas dene wale

sūraj se saa.e kī tavaqqo.a bādal se sunahrī dhuup kī

kāñToñ se mahakte phuul kī ḳhushbū sahrā se hariyālī kī

kaise bhūle aap haiñ sāhab kaisī tavaqqo.a rakhte haiñ

kīchaḌ meñ jab aap chaleñge paañv to gande hoñge hī

jhūToñ kī sohbat meñ rah kar sach kaise kah pā.eñge

mare hue insāñ ke lahm se kyuuñ raġhbat rakhte haiñ aap

ab bhī thoḌā vaqt bahut hai qalb-e-māhiyat kar leñ

ahl-e-havas ke sāmne jhuk ke

baunoñ kī sanā meñ be-ḳhud haiñ

apne jī kā saudā kar ke logoñ kī malāmat sahte haiñ

bahut huā bas band kareñ ab apnī zamīr-faroshī ko

duniyā vaale sochte hoñge aalam kyuuñ aise haiñ ab

lekin un ko kaun batā.e

aap ne zar aur jism kī ḳhātir

jāhil ko tauqīr hai baḳhshī aalim ko ban-bās diyā hai

aur aalim tujh kizb-e-sifat ko mahv-e-hairat taak rahā hai

ilm jo shahr-e-ilm ke bāhar ab bhī girya kartā hai

apnī aur terī hālat par ġham ke aañsū rotā hai

kaash ki ho taufīq zarā sī

thoḌā pashemāñ ho leñ aap

tauba kī manzil se pahle

apnī sūrat dekheñ aap

suraj se sae ki tawaqqoa baadal se sunahri dhup ki

kanTon se mahakte phul ki KHushbu sahra se hariyali ki

kaise bhule aap hain sahab kaisi tawaqqoa rakhte hain

kichaD mein jab aap chalenge panw to gande honge hi

jhuTon ki sohbat mein rah kar sach kaise kah paenge

mare hue insan ke lahm se kyun raghbat rakhte hain aap

ab bhi thoDa waqt bahut hai qalb-e-mahiyat kar len

ahl-e-hawas ke samne jhuk ke

baunon ki sana mein be-KHud hain

apne ji ka sauda kar ke logon ki malamat sahte hain

bahut hua bas band karen ab apni zamir-faroshi ko

duniya wale sochte honge aalam kyun aise hain ab

lekin un ko kaun batae

aap ne zar aur jism ki KHatir

jahil ko tauqir hai baKHshi aalim ko ban-bas diya hai

aur aalim tujh kizb-e-sifat ko mahw-e-hairat tak raha hai

ilm jo shahr-e-ilm ke bahar ab bhi girya karta hai

apni aur teri haalat par gham ke aansu rota hai

kash ki ho taufiq zara si

thoDa pasheman ho len aap

tauba ki manzil se pahle

apni surat dekhen aap