aali-ji ki gum-shuda bayaz

bayāz chorī huī hai janāb-e-'ālī' kī

bayāz-chor ne chorī baḌī misālī kī

zarūr chor koī sāriq-e-adab hogā

use bayāz churāne kā ḳhaas Dhab hogā

maiñ aise chor kī dānish-varī pe huuñ hairān

jo ek raat meñ ban baiThā sāhab-e-dīvān

janāb-e-'ālī' ke column the jitne matbūā

samajh ke chhoḌ gayā un ko nasr-e-mamnuā

ajiib chor thā nasrī kalām chhoḌ gayā

bayāz le gayā column tamām chhoḌ gayā

ġhazal ke saath ga.ī masnavī bhī dohā bhī

tamām shahr ne maanā thā jis kā lohā bhī

chhupā huā thā jo shā.ir nikal rahā hogā

vo is bayāz ke maqte badal rahā hogā

janāb-e-'ālī' kī fikr-e-jamīl thī ye bayāz

rubā.iyoñ meñ baḌī ḳhud-kafīl thī ye bayāz

jis anjuman meñ ye jaatī thī hashr kartī thī

adab ke saath siyāsat bhī nashr kartī thī

mushā.eron meñ ba-sad ehtirām aatī thī

yahī bayāz musībat meñ kaam aatī thī

isī bayāz se dohoñ ko āzmānā thā

vo shāḳh hī na rahī jis pe āshiyāna thā

bayaz chori hui hai janab-e-'ali' ki

bayaz-chor ne chori baDi misali ki

zarur chor koi sariq-e-adab hoga

use bayaz churane ka KHas Dhab hoga

main aise chor ki danish-wari pe hun hairan

jo ek raat mein ban baiTha sahab-e-diwan

janab-e-'ali' ke column the jitne matbua

samajh ke chhoD gaya un ko nasr-e-mamnua

ajib chor tha nasri kalam chhoD gaya

bayaz le gaya column tamam chhoD gaya

ghazal ke sath gai masnawi bhi doha bhi

tamam shahr ne mana tha jis ka loha bhi

chhupa hua tha jo shair nikal raha hoga

wo is bayaz ke maqte badal raha hoga

janab-e-'ali' ki fikr-e-jamil thi ye bayaz

rubaiyon mein baDi KHud-kafil thi ye bayaz

jis anjuman mein ye jati thi hashr karti thi

adab ke sath siyasat bhi nashr karti thi

mushaeron mein ba-sad ehtiram aati thi

yahi bayaz musibat mein kaam aati thi

isi bayaz se dohon ko aazmana tha

wo shaKH hi na rahi jis pe aashiyana tha