aam ruKHsat ho gaya

aah sad-afsos hai phir aam ruḳhsat ho gayā

jis ko khātā thā maiñ sub.h-o-shām ruḳhsat ho gayā

kyoñ na us ġham par paḌhūñ maiñ innā lillāh dosto

dar-haqīqat rab kā ik in.aam ruḳhsat ho gayā

hausla rakh muntazir rah mausam-e-garmā kā phir

bain mat kar ab dil-e-nākām ruḳhsat ho gayā

dekhne se jis ke hotī thiiñ nigāheñ shād-bād

jis se paatā thā ye dil ārām ruḳhsat ho gayā

roknā chāhā bahut lekin vo niklā bevafā

āḳhirash mahbūb-e-ḳhās-o-ām ruḳhsat ho gayā

phīkī lagtī hai mujhe to zindagī us ke baġhair

kaif-o-lazzat kā vo shīrīñ jaam ruḳhsat ho gayā

sair kyā hotī tabī.at batn hai ḳhālī abhī

chhoḌ kar vo mujh ko tishna-kām ruḳhsat ho gayā

ab kisī ke jaal meñ ye qaid ho saktā nahīñ

thā 'asar' jis kā asīr-e-dām ruḳhsat ho gayā

aah sad-afsos hai phir aam ruKHsat ho gaya

jis ko khata tha main subh-o-sham ruKHsat ho gaya

kyon na us gham par paDhun main inna lillah dosto

dar-haqiqat rab ka ek inam ruKHsat ho gaya

hausla rakh muntazir rah mausam-e-garma ka phir

bain mat kar ab dil-e-nakaam ruKHsat ho gaya

dekhne se jis ke hoti thin nigahen shad-baad

jis se pata tha ye dil aaram ruKHsat ho gaya

rokna chaha bahut lekin wo nikla bewafa

aaKHirash mahbub-e-KHas-o-am ruKHsat ho gaya

phiki lagti hai mujhe to zindagi us ke baghair

kaif-o-lazzat ka wo shirin jam ruKHsat ho gaya

sair kya hoti tabiat batn hai KHali abhi

chhoD kar wo mujh ko tishna-kaam ruKHsat ho gaya

ab kisi ke jal mein ye qaid ho sakta nahin

tha 'asar' jis ka asir-e-dam ruKHsat ho gaya