aanchal ke pallu ko ganTh nahin lagti

aaj tumhāre shahr se vāpas lauT rahī huuñ

lekin kaise

sābit-o-sālim kaun palaT kar jaatā hai

kis dil se aa.ī thī maiñ

tum se milnā kaisā hogā

jaane kyā kuchh man meñ thā

tum se milūñgī aur

tum se milūñgī aur bahut sī bāteñ hoñgī kuchh hoñToñ se bah nikleñgī kuchh āñkheñ tahrīr kareñgī

lekin ye sab ḳhvāb thā merā

dekho vāpas lauT rahī huuñ

tārkol kī bal khātī ye sāñpoñ jaisī saḌkeñ har ik moḌ tumhārī yādeñ

aur havā meñ lams tumhārā

bhīgtī āñkheñ le kar vāpas lauT rahī huuñ

lauT rahī huuñ ḳhālī aañkh aur ḳhālī haath

duur ufuq par zard udāsī kī chādar meñ lipTā chāñd

bijlī ke tāroñ par baiThe kuchh ḳhāmosh parind

is chaltī gaaḌī meñ jaise maiñ afsurda-jāñ

ek taraf chiḌiyoñ kā chamba peḌoñ par vo shor machātā

lekin jis kā dil bujh jaa.e us ko in se kyā

poñchh rahī huuñ bhīgtī āñkheñ

ik ik karke terī yādeñ

āñchal ke pallū meñ bāñdh rahī huuñ

lekin gāñTh nahīñ lagtī hai

merī poreñ saath nahīñ haiñ

jaise mere haath nahīñ haiñ

aaj tumhaare shahr se wapas lauT rahi hun

lekin kaise

sabit-o-salim kaun palaT kar jata hai

kis dil se aai thi main

tum se milna kaisa hoga

jaane kya kuchh man mein tha

tum se milungi aur

tum se milungi aur bahut si baaten hongi kuchh honTon se bah niklengi kuchh aankhen tahrir karengi

lekin ye sab KHwab tha mera

dekho wapas lauT rahi hun

tarkol ki bal khati ye sanpon jaisi saDken har ek moD tumhaari yaaden

aur hawa mein lams tumhaara

bhigti aankhen le kar wapas lauT rahi hun

lauT rahi hun KHali aankh aur KHali hath

dur ufuq par zard udasi ki chadar mein lipTa chand

bijli ke taron par baiThe kuchh KHamosh parind

is chalti gaDi mein jaise main afsurda-jaan

ek taraf chiDiyon ka chamba peDon par wo shor machata

lekin jis ka dil bujh jae us ko in se kya

ponchh rahi hun bhigti aankhen

ek ek karke teri yaaden

aanchal ke pallu mein bandh rahi hun

lekin ganTh nahin lagti hai

meri poren sath nahin hain

jaise mere hath nahin hain