aandhi ka rajaz

sannāToñ kī tah meñ ġhāsibāna raftār se baḌhtā huā

kisī masrūqa raaz kā dabīz ḳhalā

aur us meñ tezī se gardish kartā huā

ek jilā-vatan sayyāra

kisī ujaaḌ kahkashāñ ko na chhoḌne par musir

raushnī kī bāqī-māñda āvāz

aur shikasta āfāq ke ḳhākistarī gahrāo meñ

sūraj ke faurī ġhayāb ke

miTte hue āsār

mujhe bachānā hai

us kā.enātī virse ko

sarāboñ kī tezābī phunkār ke saath

zalzaloñ kī jaltī piiTh ko Dhaal banā kar

aur aag ke favvāre kī kumak le kar

jo kisī qadīm sayāf kī

pur-ḳharāsh niyām meñ mahbūs hai

us lā-mutanāhī ḳharābe ke liye

mujhe ījād karnī hai ek na.ī bahār

maut kī māyūs aur muzmahil ġhazab-nākī ko

vaqt ke ġhair-mutavāzin bojh se taḌḳhī huī zamīnoñ par

az-sar-e-nau bālīda kar ke

adhūre sāyoñ ke ġhol

tārīḳh ke āsebī chhakḌe ko

be-parvā.ī aur anāḌī-pan se khīñchte haiñ

sayyāroñ kī guzargāheñ

bhurnhurī aur mukaddar ho ga.ī haiñ

kā.enāt ke muñh par

kharoñche paḌ ga.e haiñ

siyāsī jitne gahre adam jitne lambe

rauñd meñ aa.ī huī piilī pattiyoñ kī tarah

sitāre āsmān par liip diye ga.e haiñ

un ki martūb jhilmilāhaT añdheroñ ko uksātī hai

aur nahūsatoñ kā hausla baḌhātī hai

maiñ hazāroñ nuurī baras ke raqbe ko

zamān o makān kī nāravā amal-dārī se

nikālne ke liye uThī huuñ

pighle hue faulād ke favvāre kī tarah

ek pur-ġhubār mismārī ek ḳhār-dār duḳhānī uThān ke saath

banī-nau-e-insān

tumhāre liye yahī behtar hai ki

jarsūmoñ kī tarah merī aañkh se ojhal raho

merī raah meñ apne shahr aur vīrāne mat bichhāo

varnā mujhe ġhussa yā hañsī aa jā.egī

aur ye tuġhyānī pahāḌ aur tinke ko ham vazn jāntī hai

ai hasharāt-ul-arz! mere pair bahut baḌe haiñ

kahīñ aisā na ho ki tumhārī zamīn

ḳhashḳhāsh ke daane kī tarah

mere kaf-e-pā se chipak jaa.e

aur mujhe patā bhī na chale

sannaTon ki tah mein ghasibana raftar se baDhta hua

kisi masruqa raaz ka dabiz KHala

aur us mein tezi se gardish karta hua

ek jila-watan sayyara

kisi ujaD kahkashan ko na chhoDne par musir

raushni ki baqi-manda aawaz

aur shikasta aafaq ke KHakistari gahrao mein

suraj ke fauri ghayab ke

miTte hue aasar

mujhe bachana hai

us kaenati wirse ko

sarabon ki tezabi phunkar ke sath

zalzalon ki jalti piTh ko Dhaal bana kar

aur aag ke fawware ki kumak le kar

jo kisi qadim sayaf ki

pur-KHarash niyam mein mahbus hai

us la-mutanahi KHarabe ke liye

mujhe ijad karni hai ek nai bahaar

maut ki mayus aur muzmahil ghazab-naki ko

waqt ke ghair-mutawazin bojh se taDKHi hui zaminon par

az-sar-e-nau baalida kar ke

adhure sayon ke ghol

tariKH ke aasebi chhakDe ko

be-parwai aur anaDi-pan se khinchte hain

sayyaron ki guzargahen

bhurnhuri aur mukaddar ho gai hain

kaenat ke munh par

kharonche paD gae hain

siyasi jitne gahre adam jitne lambe

raund mein aai hui pili pattiyon ki tarah

sitare aasman par lip diye gae hain

un ki martub jhilmilahaT andheron ko uksati hai

aur nahusaton ka hausla baDhati hai

main hazaron nuri baras ke raqbe ko

zaman o makan ki narawa amal-dari se

nikalne ke liye uThi hun

pighle hue faulad ke fawware ki tarah

ek pur-ghubar mismari ek KHar-dar duKHani uThan ke sath

bani-nau-e-insan

tumhaare liye yahi behtar hai ki

jarsumon ki tarah meri aankh se ojhal raho

meri rah mein apne shahr aur virane mat bichhao

warna mujhe ghussa ya hansi aa jaegi

aur ye tughyani pahaD aur tinke ko hum wazn jaanti hai

ai hasharaat-ul-arz! mere pair bahut baDe hain

kahin aisa na ho ki tumhaari zamin

KHashKHash ke dane ki tarah

mere kaf-e-pa se chipak jae

aur mujhe pata bhi na chale