aankhen meri baqi un ka

ḳhud dūdmān-e-qibla-e-ālam kareñ ḳhayāl

dil meñ bahut dinoñ se hai kāñTā chubhā huā

us ḳhāndāñ ke ek rañgīle piyā ke ghar

farzand-e-arjumand ke ḳhatna pe kyā huā

chashme ubal rahe the surūr-o-nashāt ke

thā chāvḌī kā naqsha-e-uryāñ khiñchā huā

is mahfil-e-nashāt ke narġhe meñ vo bhī the

chehre pe jin ke zohd-o-vara.a thā likhā huā

qavvāl gā rahe the ḳhuzū'-o-ḳhushū' se

rindān-e-bul-havas meñ thā ġhauġhā machā huā

bāda-gusār khol ke baiThe the botaleñ

thā ranDiyoñ ke sāmne huqqa dharā huā

na.at-e-nabī pe ismat-e-āvāra nukta-chīñ

ḳhauf-e-ḳhudā thā zohrā-vashoñ meñ ghirā huā

daulat ke Dher 'zāhidā' parvīn pe nisār

dahqān-e-ḳhasta-hāl kā chūlhā bujhā huā

the ḳhādimoñ ke peT pe patthar bañdhe hue

aur kanchanoñ pe bāb-e-saḳhāvat khulā huā

'shorish' us ek manzar-e-zohra-gudāz meñ

dast-e-duā thā arsh kī jānib uThā huā

is hashr-e-nau meñ qibla-e-ālam kahāñ the aap

dekhā to hogā aap ne jo mājrā huā

KHud dudman-e-qibla-e-alam karen KHayal

dil mein bahut dinon se hai kanTa chubha hua

us KHandan ke ek rangile piya ke ghar

farzand-e-arjumand ke KHatna pe kya hua

chashme ubal rahe the surur-o-nashat ke

tha chawDi ka naqsha-e-uryan khincha hua

is mahfil-e-nashat ke narghe mein wo bhi the

chehre pe jin ke zohd-o-wara tha likha hua

qawwal ga rahe the KHuzu'-o-KHushu' se

rindan-e-bul-hawas mein tha ghaugha macha hua

baada-gusar khol ke baiThe the botalen

tha ranDiyon ke samne huqqa dhara hua

nat-e-nabi pe ismat-e-awara nukta-chin

KHauf-e-KHuda tha zohra-washon mein ghira hua

daulat ke Dher 'zahida' parwin pe nisar

dahqan-e-KHasta-haal ka chulha bujha hua

the KHadimon ke peT pe patthar bandhe hue

aur kanchanon pe bab-e-saKHawat khula hua

'shorish' us ek manzar-e-zohra-gudaz mein

dast-e-dua tha arsh ki jaanib uTha hua

is hashr-e-nau mein qibla-e-alam kahan the aap

dekha to hoga aap ne jo majra hua