aankhen

ye āñkheñ daftaroñ kī fā.iloñ par ġhaur kartī haiñ

unheñ tartīb dene meñ mu'āvin haiñ

ye āñkheñ vo kasauTī haiñ

jo sab kī dhotiyoñ kurtoñ ‘amāmoñ

chādaroñ aur dāḌhiyoñ ko naap kar

e'lān kartī haiñ

fulāñ kā nāma-e-ā'māl baa.eñ haath meñ hogā

ye āñkheñ dekhtī haiñ us jagah ko

jis jagah tak tum ne jaanā hai

mirā matlab hai mahloñ gāḌiyoñ noToñ

hasīñ jismoñ hazāroñ dollaroñ kī mez par

rakkhī huī mahñgī sharāboñ ke nazāroñ se

ye āñkheñ dūrbīneñ haiñ

ye āñkheñ roz shīshe meñ

badan kī phailtī charbī muhāse kiil

jhhā.ī ke nishāñ aur baḌhte bāloñ ko dikhātī haiñ

ye āñkheñ is liye haiñ

nīm-raushan aur mutavāzin fazā vaale

shabistānoñ meñ so jaa.eñ

hasīñ ḳhvāboñ meñ kho jaa.eñ

agar ye jhoñpaḌoñ meñ

bhuuk se martī huī mehnat kī jānib

dekhne kā sochnā chāheñ

to in pe haath rakh lenā

ye āñkheñ is liye thoḌī haiñ

sailāboñ meñ bahte ḳhvāb ke

hilte hue us haath ko dekheñ

jo ā.inda na hil paane ke Dar se hiltā jaatā hai

ye āñkheñ is liye thoḌī haiñ

in se haspatāloñ ke phisalte farsh meñ dhañste

larazte zard hāthoñ meñ

davā.ī kī rasīdoñ par likhī raqmeñ paḌhī jaa.eñ

ki jin meñ nisf se zaa.id

tabīboñ ke commission haiñ

ye āñkheñ is liye thoḌī haiñ

aivānoñ ke aage zindagī kī maarī āñkhoñ meñ

vo aañsū dekhne baiTheñ

jo ac meñ sigāreñ phūñkte afsar ke kahne par

girā.ī jaane vaalī gas ke bā'is bhī nikle haiñ

ye āñkheñ is liye thoḌī haiñ

apne gum-shuda beToñ kī tasvīreñ uThā.e

ghūmtī bevāoñ kī āñkhoñ meñ phaile

ḳhauf ko dekheñ

ik aise ḳhauf ko

jo un kī āñkheñ pī gayā hai aur kaleje khā gayā hai

in āñkhoñ kī balā se

shahr bhar meñ kitnā kachrā hai

aur is kachre se kitne bhūke bachche aur kutte

apnī ḳhūrākeñ uThāte haiñ

in āñkhoñ ko kisī bhī bad-numā manzar se

kosoñ duur rakkho

ḳhūbsūrat vādiyoñ meñ jā ke

taaza oxygen do

inheñ bas vo dikhāo jo tumheñ taskīn detā hai

tumheñ āñkheñ mubārak hoñ

ye aankhen daftaron ki failon par ghaur karti hain

unhen tartib dene mein mu'awin hain

ye aankhen wo kasauTi hain

jo sab ki dhotiyon kurton ‘amamon

chadaron aur daDhiyon ko nap kar

e'lan karti hain

fulan ka nama-e-a'mal baen hath mein hoga

ye aankhen dekhti hain us jagah ko

jis jagah tak tum ne jaana hai

mera matlab hai mahlon gaDiyon noTon

hasin jismon hazaron dollaron ki mez par

rakkhi hui mahngi sharabon ke nazaron se

ye aankhen durbinen hain

ye aankhen roz shishe mein

badan ki phailti charbi muhase kil

jhhai ke nishan aur baDhte baalon ko dikhati hain

ye aankhen is liye hain

nim-raushan aur mutawazin faza wale

shabistanon mein so jaen

hasin KHwabon mein kho jaen

agar ye jhonpaDon mein

bhuk se marti hui mehnat ki jaanib

dekhne ka sochna chahen

to in pe hath rakh lena

ye aankhen is liye thoDi hain

sailabon mein bahte KHwab ke

hilte hue us hath ko dekhen

jo aainda na hil pane ke Dar se hilta jata hai

ye aankhen is liye thoDi hain

in se haspatalon ke phisalte farsh mein dhanste

larazte zard hathon mein

dawai ki rasidon par likhi raqmen paDhi jaen

ki jin mein nisf se zaid

tabibon ke commission hain

ye aankhen is liye thoDi hain

aiwanon ke aage zindagi ki mari aankhon mein

wo aansu dekhne baiThen

jo ac mein sigaren phunkte afsar ke kahne par

girai jaane wali gas ke ba'is bhi nikle hain

ye aankhen is liye thoDi hain

apne gum-shuda beTon ki taswiren uThae

ghumti bewaon ki aankhon mein phaile

KHauf ko dekhen

ek aise KHauf ko

jo un ki aankhen pi gaya hai aur kaleje kha gaya hai

in aankhon ki bala se

shahr bhar mein kitna kachra hai

aur is kachre se kitne bhuke bachche aur kutte

apni KHuraken uThate hain

in aankhon ko kisi bhi bad-numa manzar se

koson dur rakkho

KHubsurat wadiyon mein ja ke

taza oxygen do

inhen bas wo dikhao jo tumhein taskin deta hai

tumhein aankhen mubarak hon