aao kamre se nikalte hain

aao kamre se nikalte haiñ kahīñ chalte haiñ

rauzan-e-habs meñ Thahrī huī zindāñ kī havā

pā-ba-zanjīr kiye jaatī hai

har taraf ḳhauf bharī āñkhoñ meñ

ek talvār sī lahrātī hai

koī dar baaz nahīñ

zer-e-lab bhī koī āvāz nahīñ

aisā andesha-e-kam-yābī-e-harf

kuchh bhī to yaad nahīñ

ham koī baat salīqe se nahīñ kahte the

is pe bhī shoḳhī-e-guftār kā aalam ye thā

ek pal chup bhī nahīñ rahte the

aao kamre se nikalte haiñ kahīñ chalte haiñ

duur peḌoñ se ulajhtī huī ḳhvābīda havā kā dāman

chupke se khīñchte haiñ

aao kahīñ baiThte haiñ

ham vahī āb-o-havā bhī hai vahī

asar-e-āb-o-havā koī nahīñ

saañs lene kī sazā bhī hai vahī

aur phir aisī sazā koī nahīñ

tesha-e-jabr se Takrā.e hue hāthoñ meñ

nāma-e-ahd-e-vafā bhī hai vahī

is meñ bhī bū-e-vafā koī nahīñ

aur agar hai

to patā koī nahīñ

aao phir aisā kareñ

dil meñ jo kuchh bhī hai tahrīr kareñ paanī par

yā phir ik duuje kī peshānī par

aab aur aag ke is khel meñ mālūm nahīñ

kaun hai kis kī nigahbānī par

phir bhī mahsūs to hotā hai hameñ

koī māmūr hai nigarānī par

koī āvāz

koī harf-e-sadā

zer-e-lab koī duā

yā koī chīḳh ki sannāTe kī dīvār gire

aur lagātār gire

aao kamre se nikalte haiñ kahīñ chalte haiñ

ham jo hairānī se ik dūsre ko takte haiñ

aao kamre se nikalte hain kahin chalte hain

rauzan-e-habs mein Thahri hui zindan ki hawa

pa-ba-zanjir kiye jati hai

har taraf KHauf bhari aankhon mein

ek talwar si lahraati hai

koi dar baz nahin

zer-e-lab bhi koi aawaz nahin

aisa andesha-e-kam-yabi-e-harf

kuchh bhi to yaad nahin

hum koi baat saliqe se nahin kahte the

is pe bhi shoKHi-e-guftar ka aalam ye tha

ek pal chup bhi nahin rahte the

aao kamre se nikalte hain kahin chalte hain

dur peDon se ulajhti hui KHwabida hawa ka daman

chupke se khinchte hain

aao kahin baiThte hain

hum wahi aab-o-hawa bhi hai wahi

asar-e-ab-o-hawa koi nahin

sans lene ki saza bhi hai wahi

aur phir aisi saza koi nahin

tesha-e-jabr se Takrae hue hathon mein

nama-e-ahd-e-wafa bhi hai wahi

is mein bhi bu-e-wafa koi nahin

aur agar hai

to pata koi nahin

aao phir aisa karen

dil mein jo kuchh bhi hai tahrir karen pani par

ya phir ek duje ki peshani par

aab aur aag ke is khel mein malum nahin

kaun hai kis ki nigahbani par

phir bhi mahsus to hota hai hamein

koi mamur hai nigarani par

koi aawaz

koi harf-e-sada

zer-e-lab koi dua

ya koi chiKH ki sannaTe ki diwar gire

aur lagatar gire

aao kamre se nikalte hain kahin chalte hain

hum jo hairani se ek dusre ko takte hain