aap-biti

mere ḳhvāboñ ke shabistāñ meñ ujālā na karo

ki bahut duur saverā nazar aatā hai mujhe

chhap ga.e haiñ mirī nazroñ se ḳhad-o-ḳhāl-e-hayāt

har taraf abr ghanerā nazar aatā hai mujhe

chāñd taare to kahāñ ab koī jugnū bhī nahīñ

kitnā shaffāf añdherā nazar aatā hai mujhe

koī tābinda kiran yuuñ mire dil par lapkī

jaise so.e hue mazlūm pe talvār uThe

kisī naġhme kī sadā guuñj ke yuuñ tharrā.ī

jaise TuuTī huī pāzeb se jhankār uThe

maiñ ne palkoñ ko uThāyā bhī to aañsū paa.e

mujh se ab ḳhaak javānī kā koī baar uThe

tum ne rātoñ meñ sitāre to TaTole hoñge

maiñ ne rātoñ meñ añdhere hī añdhere dekhe

tum ne ḳhvāboñ ke paristāñ to sajā.e hoñge

maiñ ne māhaul ke shab-rañg pharere dekhe

tum ne ik taar kī jhankār to sun lī hogī

maiñ ne gītoñ meñ udāsī ke basere dekhe

mire ġham-ḳhvār mire dost tumheñ kyā ma.alūm

zindagī maut ke mānind guzārī maiñ ne

ek bigḌī huī sūrat ke sivā kuchh bhī na thā

jab bhī hālāt kī tasvīr utārī maiñ ne

kisī aflāk-nashīñ ne mujhe dhutkār diyā

jab bhī rokī hai muqaddar kī savārī maiñ ne

mire ġham-ḳhvār mire dost tumheñ kyā ma.alūm!

mere KHwabon ke shabistan mein ujala na karo

ki bahut dur sawera nazar aata hai mujhe

chhap gae hain meri nazron se KHad-o-KHal-e-hayat

har taraf abr ghanera nazar aata hai mujhe

chand tare to kahan ab koi jugnu bhi nahin

kitna shaffaf andhera nazar aata hai mujhe

koi tabinda kiran yun mere dil par lapki

jaise soe hue mazlum pe talwar uThe

kisi naghme ki sada gunj ke yun tharrai

jaise TuTi hui pazeb se jhankar uThe

main ne palkon ko uThaya bhi to aansu pae

mujh se ab KHak jawani ka koi bar uThe

tum ne raaton mein sitare to TaTole honge

main ne raaton mein andhere hi andhere dekhe

tum ne KHwabon ke paristan to sajae honge

main ne mahaul ke shab-rang pharere dekhe

tum ne ek tar ki jhankar to sun li hogi

main ne giton mein udasi ke basere dekhe

mere gham-KHwar mere dost tumhein kya malum

zindagi maut ke manind guzari main ne

ek bigDi hui surat ke siwa kuchh bhi na tha

jab bhi haalat ki taswir utari main ne

kisi aflak-nashin ne mujhe dhutkar diya

jab bhi roki hai muqaddar ki sawari main ne

mere gham-KHwar mere dost tumhein kya malum!