aarzu

na jaane mere dil kī ḳhud-farebī kyoñ nahīñ jaatī

taḳhayyul se hasīñ ḳhvāboñ ke manzar gum nahīñ hote

mirī jaañ se fusūn-e-soz-o-ġham chhin kyoñ nahīñ jaatā

na jaane mere dil kī ḳhud-farebī kyoñ nahīñ jaatī

vahī ġhurbat vahī mushkil vahī vīrāñ fazā.eñ haiñ

vahī mazlūm insāñ haiñ vahī bebas duā.eñ haiñ

nizām-e-bazm-e-insāñ meñ vahī zālim ta.ayyush hai

havas-kārī kī mahfil meñ vahī kāfir jafā.eñ haiñ

naved-e-sub.h mere dil kī duniyā meñ nahīñ aatī

mirī tārīki-e-shab kyoñ munavvar ho nahīñ jaatī

nizām-e-bazm-e-insāñ kyoñ sañvarne meñ nahīñ aatā

siyāhī dhul nahīñ jaatī tabāhī so nahīñ jaatī

na jaane mere dil ki KHud-farebi kyon nahin jati

taKHayyul se hasin KHwabon ke manzar gum nahin hote

meri jaan se fusun-e-soz-o-gham chhin kyon nahin jata

na jaane mere dil ki KHud-farebi kyon nahin jati

wahi ghurbat wahi mushkil wahi viran fazaen hain

wahi mazlum insan hain wahi bebas duaen hain

nizam-e-bazm-e-insan mein wahi zalim tayyush hai

hawas-kari ki mahfil mein wahi kafir jafaen hain

nawed-e-subh mere dil ki duniya mein nahin aati

meri tariki-e-shab kyon munawwar ho nahin jati

nizam-e-bazm-e-insan kyon sanwarne mein nahin aata

siyahi dhul nahin jati tabahi so nahin jati