aarzu rahiba hai
aarzū rāhiba hai be-kas-o-tanhā-o-hazīñ
aarzū rāhiba hai umr guzārī jis ne
inhī mahrūm-e-azal rāhiboñ ma.abad ke nigahbānoñ meñ
in mah-o-sāl-e-yak-āhañg ke aivānoñ meñ
kaise ma.abad pe hai tārīkī kā saaya bhārī
rū-e-ma.abūd se haiñ ḳhuun ke dhāre jaarī
rāhiba raat ko ma.abad se nikal aatī hai
jhilmilātī huī ik sham.a liye
laḌkhaḌātī huī farsh-o-dar-o-dīvār se Takrātī huī
dil meñ kahtī hai ki is sham.a kī lau hī shāyad
duur ma.abad se bahut duur chamakte hue anvār kī tamsīl bane
aane vaalī sahar-e-nau yahī qindīl bane
aarzū rāhiba hai be-kas-o-tanhā-o-hazīñ
haañ magar rāhiboñ ko is kī ḳhabar ho kyūñkar
ḳhud meñ kho.e hue sahme hue sargoshī se Darte hue
rāhiboñ ko ye ḳhabar ho kyūñkar
kis liye rāhiba hai be-kas-o-tanhā-o-hazīñ
rāhib istāda haiñ marmar kī siloñ ke mānind
be-karāñ ijz kī jāñ-soḳhta vīrānī meñ
jis meñ ugte nahīñ dil-sozi-e-insāñ ke gulāb
rāhiba sham.a liye phirtī hai
ye samajhtī hai ki is se dar-e-ma.abad pe kabhī
ghaas par os jhalak uTThegī
sang-rezoñ pe koī chaap sunā.ī degī
aarzu rahiba hai be-kas-o-tanha-o-hazin
aarzu rahiba hai umr guzari jis ne
inhi mahrum-e-azal rahibon mabad ke nigahbanon mein
in mah-o-sal-e-yak-ahang ke aiwanon mein
kaise mabad pe hai tariki ka saya bhaari
ru-e-mabud se hain KHun ke dhaare jari
rahiba raat ko mabad se nikal aati hai
jhilmilati hui ek shama liye
laDkhaDati hui farsh-o-dar-o-diwar se Takraati hui
dil mein kahti hai ki is shama ki lau hi shayad
dur mabad se bahut dur chamakte hue anwar ki tamsil bane
aane wali sahar-e-nau yahi qindil bane
aarzu rahiba hai be-kas-o-tanha-o-hazin
han magar rahibon ko is ki KHabar ho kyunkar
KHud mein khoe hue sahme hue sargoshi se Darte hue
rahibon ko ye KHabar ho kyunkar
kis liye rahiba hai be-kas-o-tanha-o-hazin
rahib istada hain marmar ki silon ke manind
be-karan ijz ki jaan-soKHta virani mein
jis mein ugte nahin dil-sozi-e-insan ke gulab
rahiba shama liye phirti hai
ye samajhti hai ki is se dar-e-mabad pe kabhi
ghas par os jhalak uTThegi
sang-rezon pe koi chap sunai degi
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.