aas-mahal

ek rū-pahlī sī choTī par

jagmag jagmag jaag rahā hai ās-mahal

ūñchī ūñchī rañg-rañgīlī dīvāreñ haiñ

chāroñ jānib har patthar par

maanī aur bahzād se baḌh kar

na.e anokhe naqsh bane haiñ

dīvāreñ haiñ kitnī anokhī

jin meñ lākhoñ taaq bane haiñ

in tāqoñ meñ merī āñkheñ

larzāñ larzāñ dīpak ban kar

har-dam jaltī rahtī haiñ

aur ye mere nirmal aañsū

Dare Dare se sahme sahme chehre ban kar

jaane kis ko jhāñkte haiñ aur chhup jaate haiñ

baḌe baḌe āseb-zada in kamroñ meñ

bhūlī-bisrī yādeñ us kī

dabe dabe paañv chaltī haiñ

jin kī aahaT ruuh ke suune dālānoñ tak

chīḳheñ ban kar aatī hai

jaane kab se ās-mahal se

maiñ āñkheñ aur aañsū ban kar

vīrāñ vīrāñ suunā suunā

andhā rasta dekh rahā huuñ

ek ru-pahli si choTi par

jagmag jagmag jag raha hai aas-mahal

unchi unchi rang-rangili diwaren hain

chaaron jaanib har patthar par

mani aur bahzad se baDh kar

nae anokhe naqsh bane hain

diwaren hain kitni anokhi

jin mein lakhon taq bane hain

in taqon mein meri aankhen

larzan larzan dipak ban kar

har-dam jalti rahti hain

aur ye mere nirmal aansu

Dare Dare se sahme sahme chehre ban kar

jaane kis ko jhankte hain aur chhup jate hain

baDe baDe aaseb-zada in kamron mein

bhuli-bisri yaaden us ki

dabe dabe panw chalti hain

jin ki aahaT ruh ke sune dalanon tak

chiKHen ban kar aati hai

jaane kab se aas-mahal se

main aankhen aur aansu ban kar

viran viran suna suna

andha rasta dekh raha hun