آسیب اور میں

بہ وقت صبح مجھ کو روشنی نے یہ ہدایت دی

کہ تم کو وقت کا بازو پکڑ کے ساتھ چلنا ہے

میں کچھ کہتا کہ اس سے پہلے میری ماں

مجھے اسکول لے آئی

میں جب لوٹا مجھے پھر سے کسی آسیب نے گھیرا

جو لالچ دے کے کہتا تھا

سنو پیارے تمہیں پیسے کمانے ہیں

تمہیں بندوق لا کر دوں

تمہیں نانی کے گھر جانا

تمہارا قد کہو تو پاپا کے جیسا بنا دوں میں

میں سب کر سکتا ہوں لیکن تمہیں بھی وقت کا بازو

پکڑ کے ساتھ چلنا ہے

تمہیں اتنی سی میری بات سننی ہے

میں اس کی بات سن کر دور تک آگے نکل آیا

مری خواہش تو وہ آسیب ویسے پوری کرتا تھا

مگر اس کے بدل میں

سب سے پیاری چیز مجھ سے چھین لیتا تھا

میں کچھ بھی سوچنے سے آج ڈرتا ہوں

مگر پھر بھی میں اکثر سوچ لیتا ہوں

مرے ماں باپ پر آسیب کی نظریں نہ پڑ جائیں

اگر میں آج مر جاؤں تو بہتر ہے