aaseb

ye merā vahm hai shāyad

magar aksar

mire har har nafas se be-sabab paiham ulajhte

silsiloñ kī raushnī meñ

mujhe mahsūs sā hone lagā hai

ki har lamhe kī sangīñ oT meñ

simTā huā hālāt kā ifrīt

shikast-o-reḳht ke darpe

barābar taak meñ baiThā huā hai

yahī hālāt kā ifrīt

inhī lamhoñ kī parbat se utar kar

vasūq-e-jabr se chhā jā.egā yalġhār ban kar

taraddud se tadabbur se tarāshī

in fazāoñ par

jinheñ ḳhush-fahmiyāñ merī

abhī tak shauq se detī rahī haiñ

suhānā naam apnī kā.enāt-e-zehn-o-dil kā

ye merī kā.enāt-e-zehn-o-dil bhī

agar is umr ke mahdūd arse tak

mirā hissa nahīñ hai

mire a.amāl par mabnī

na koī haal hai merā

na kuchh ummīd fardā kī

mire a.amāl par mabnī

mirī uqbā bhī kyā hogī

mirī uqbā bhī kyā hogī

ye mera wahm hai shayad

magar aksar

mere har har nafas se be-sabab paiham ulajhte

silsilon ki raushni mein

mujhe mahsus sa hone laga hai

ki har lamhe ki sangin oT mein

simTa hua haalat ka ifrit

shikast-o-reKHt ke darpe

barabar tak mein baiTha hua hai

yahi haalat ka ifrit

inhi lamhon ki parbat se utar kar

wasuq-e-jabr se chha jaega yalghaar ban kar

taraddud se tadabbur se tarashi

in fazaon par

jinhen KHush-fahmiyan meri

abhi tak shauq se deti rahi hain

suhana nam apni kaenat-e-zehn-o-dil ka

ye meri kaenat-e-zehn-o-dil bhi

agar is umr ke mahdud arse tak

mera hissa nahin hai

mere aamal par mabni

na koi haal hai mera

na kuchh ummid farda ki

mere aamal par mabni

meri uqba bhi kya hogi

meri uqba bhi kya hogi