aashiq aashiq bol

tū zāhid hai maiñ āshiq huuñ be-vaj.h na mujh ko ta.ane de

tū jā ke haj kā farz nibhā mujhe merā yaar manāne de

mat de tū jhūTe fatve re tū kufr na itnā tol

mujhe kāfir kāfir chheḌ na ve tū āshiq āshiq bol

maiñ pyaar usī ko kartā huuñ jis mālik se tū Dartā hai

dil andar mere rahtā hai tū sajde jis ko kartā hai

tū bātil bole duī ko tauhīd kā qaa.il maiñ bhī huuñ

jo ḳhalq hai tere ḳhāliq kī us andar shāmil maiñ bhī huuñ

har shai meñ dikhā.ī degā vo tū man kī āñkheñ khol

mujhe kāfir kāfir chheḌ na ve tū āshiq āshiq bol

tū pāñch namāzeñ paḌhtā hai maiñ har-pal us ko yaad karūñ

tū gin-gin roze rakhtā hai maiñ kabhī na koī hisāb karūñ

har den qubūlūñ maiñ us kī tū kartā hai parhez baḌe

maiñ dil kī chaah karūñ puurī tū sirf adā-e-farz kare

tū ka.abe meñ na DhūñDh sakā maiñ ne dil meñ liyā TaTol

mujhe kāfir kāfir chheḌ na ve tū āshiq āshiq bol

tū rāh-e-sharah par chaltā chal mujhe rāh-e-ishq pe chalne de

tirā zuhd mubārak ho tujh ko mujhe yaar ke rang meñ Dhalne de

bar-vaqt namāzeñ paḌhtā jā mullā kī bāñgeñ sun kar tū

mujhe gaane de re gaane de bas anhad naad kī dhun par tū

jis dhun kā mere dil andar din raat baje hai Dhol

mujhe kāfir kāfir chheḌ na ve tū āshiq āshiq bol

tire paas kitāb ilāhī hai tū nit-nit is ko khol

mire dil meñ kātib rahtā hai mire saath rahā hai bol

mujhe kāfir kāfir chheḌ na ve tū āshiq āshiq bol

tu zahid hai main aashiq hun be-wajh na mujh ko tane de

tu ja ke haj ka farz nibha mujhe mera yar manane de

mat de tu jhuTe fatwe re tu kufr na itna tol

mujhe kafir kafir chheD na we tu aashiq aashiq bol

main pyar usi ko karta hun jis malik se tu Darta hai

dil andar mere rahta hai tu sajde jis ko karta hai

tu baatil bole dui ko tauhid ka qail main bhi hun

jo KHalq hai tere KHaliq ki us andar shamil main bhi hun

har shai mein dikhai dega wo tu man ki aankhen khol

mujhe kafir kafir chheD na we tu aashiq aashiq bol

tu panch namazen paDhta hai main har-pal us ko yaad karun

tu gin-gin roze rakhta hai main kabhi na koi hisab karun

har den qubulun main us ki tu karta hai parhez baDe

main dil ki chah karun puri tu sirf ada-e-farz kare

tu kabe mein na DhunDh saka main ne dil mein liya TaTol

mujhe kafir kafir chheD na we tu aashiq aashiq bol

tu rah-e-sharah par chalta chal mujhe rah-e-ishq pe chalne de

tera zuhd mubarak ho tujh ko mujhe yar ke rang mein Dhalne de

bar-waqt namazen paDhta ja mulla ki bangen sun kar tu

mujhe gane de re gane de bas anhad nad ki dhun par tu

jis dhun ka mere dil andar din raat baje hai Dhol

mujhe kafir kafir chheD na we tu aashiq aashiq bol

tere pas kitab ilahi hai tu nit-nit is ko khol

mere dil mein katib rahta hai mere sath raha hai bol

mujhe kafir kafir chheD na we tu aashiq aashiq bol