aashob-e-agahi

koī batlā.e mujhe

mere in jāgte ḳhvāboñ kā muqaddar kyā hai?

maiñ ki har shai kī baqā jāntā huuñ

uḌte lamhoñ kā patā jāntā huuñ

sard aur zard sitāroñ kī tiqāpū kyā hai

rañg kyā chiiz hai ḳhushbū kyā hai

sub.h kā sehr hai kyaa, raat kā jaadū kyā hai

aur kyā chiiz hai āvāz-e-sabā jāntā huuñ

ret aur naqsh-e-qadam mauj kā rum

aañkh aur gosha-e-lab zulf kā ḳham

shaam aur sub.h kā ġham

sab kī qismat hai fanā jāntā huuñ

phir bhī ye ḳhvāb mire saath lage rahte haiñ

jāgte ḳhvāb ki jin kī koī ta.abīr nahīñ

koī tafsīr nahīñ

sūrat-e-zaḳhm hare rahte haiñ

mere hāthoñ se pare rahte haiñ

āgahī jahl se bad-tar Thahrī

jāgte ḳhvāb kī ta.abīr muqaddar Thahrī

zindagī mere liye gumbad-e-be-dar Thahrī

maiñ ki āvāz-e-sabā jāntā huuñ

uḌte lamhoñ kā patā jāntā huuñ

aur har shai kī baqā jāntā huuñ

koi batlae mujhe

mere in jagte KHwabon ka muqaddar kya hai?

main ki har shai ki baqa jaanta hun

uDte lamhon ka pata jaanta hun

sard aur zard sitaron ki tiqapu kya hai

rang kya chiz hai KHushbu kya hai

subh ka sehr hai kya, raat ka jadu kya hai

aur kya chiz hai aawaz-e-saba jaanta hun

ret aur naqsh-e-qadam mauj ka rum

aankh aur gosha-e-lab zulf ka KHam

sham aur subh ka gham

sab ki qismat hai fana jaanta hun

phir bhi ye KHwab mere sath lage rahte hain

jagte KHwab ki jin ki koi tabir nahin

koi tafsir nahin

surat-e-zaKHm hare rahte hain

mere hathon se pare rahte hain

aagahi jahl se bad-tar Thahri

jagte KHwab ki tabir muqaddar Thahri

zindagi mere liye gumbad-e-be-dar Thahri

main ki aawaz-e-saba jaanta hun

uDte lamhon ka pata jaanta hun

aur har shai ki baqa jaanta hun