aasman zard tha

ai kalī tujh ko hamārā bhī ḳhayāl aa hī gayā

ham to māyūs hue baiThe the sahrāoñ meñ

ab tirā ruup bhī dhundlā sā chalā thā dil meñ

tū bhī ik yaad sī thī jumla hasīnāoñ meñ

tah-ba-tah gard se ālūd thā din kā dāman

raat kā naam na aatā thā tamannāoñ meñ

raqs-e-shabnam kī parastār nigāhoñ ke liye

dhuup ke abr the ḳhurshīd kī bauchhāreñ thiiñ

āsmāñ zard thā jaise koī yarqāñ kā marīz

jis ke takiye ke liye ret kī dastāreñ thiiñ

dil bharā rahtā thā jalte hue chhāle kī tarah

ruuh ke vāste dīvāreñ hī dīvāreñ thiiñ

koī āvāz na aatī thī ba-juz saut-e-muhīb

koī naġhma na thā chīloñ ke tarannum ke sivā

saarā andāz thā phaile hue dariyāoñ kā

reg-e-sahrā ke samundar meñ talātum ke sivā

ḳhushk pattoñ kā namak ret ke zarroñ kī miThās

hoñT sab zā.iqe rakhte the tarannum ke sivā

kab tak is dil kī lagan raas na aatī āḳhir

muskurātā huā gardūñ pe hilāl aa hī gayā

apne dīvānoñ ko siine se lagāne ke liye

ik ġhazal-paikar o afsāna-jamāl aa hī gayā

ai falak tū ne hameñ ḳhaak se āḳhir ko chunā

ai kalī tujh ko hamārā bhī ḳhayāl aa hī gayā

ai kali tujh ko hamara bhi KHayal aa hi gaya

hum to mayus hue baiThe the sahraon mein

ab tera rup bhi dhundla sa chala tha dil mein

tu bhi ek yaad si thi jumla hasinaon mein

tah-ba-tah gard se aalud tha din ka daman

raat ka nam na aata tha tamannaon mein

raqs-e-shabnam ki parastar nigahon ke liye

dhup ke abr the KHurshid ki bauchhaaren thin

aasman zard tha jaise koi yarqan ka mariz

jis ke takiye ke liye ret ki dastaren thin

dil bhara rahta tha jalte hue chhaale ki tarah

ruh ke waste diwaren hi diwaren thin

koi aawaz na aati thi ba-juz saut-e-muhib

koi naghma na tha chilon ke tarannum ke siwa

sara andaz tha phaile hue dariyaon ka

reg-e-sahra ke samundar mein talatum ke siwa

KHushk patton ka namak ret ke zarron ki miThas

honT sab zaiqe rakhte the tarannum ke siwa

kab tak is dil ki lagan ras na aati aaKHir

muskuraata hua gardun pe hilal aa hi gaya

apne diwanon ko sine se lagane ke liye

ek ghazal-paikar o afsana-jamal aa hi gaya

ai falak tu ne hamein KHak se aaKHir ko chuna

ai kali tujh ko hamara bhi KHayal aa hi gaya