aasmani loriyan

roz-e-raushan jā chukā, haiñ shaam kī tayyāriyāñ

uḌ rahī haiñ āsmāñ par za.afrānī sāḌiyāñ

shaam ruḳhsat ho rahī hai raat kā muñh chuum kar

ho rahī haiñ charḳh par tāroñ meñ kuchh sargoshiyāñ

jalve haiñ betāb parde se nikalne ke liye

ban sañvar kar aa rahī haiñ āsmāñ kī rāniyāñ

nau urūs-e-shab ne pahnā hai libās-e-fāḳhira

āsmānī pairahan meñ kahkashānī dhāriyāñ

kārchobī shāmiyāne meñ rachī bazm-e-nashāt

saaz ne añgḌā.ī lī bajne lagī haiñ tāliyāñ

lā-javrdī farsh par hai mushtarī zohra kā raqs

nail-tan krishn ke pahlū meñ machaltī gopiyāñ

dast-o-pā kī narm va ḳhush-āhañg halkī juñbisheñ

yā fazā meñ nāchtī haiñ gungunātī bijliyāñ

sarmadī naġhmāt se saarī fazā ma.amūr hai

nutq-e-rab-e-zul-minan haiñ raat kī ḳhāmoshiyāñ

niiñd sī ā.ankhoñ meñ aatī hai jhukā jaatā hai sar

sun rahā thā der se maiñ āsmānī loriyāñ

roz-e-raushan ja chuka, hain sham ki tayyariyan

uD rahi hain aasman par zafrani saDiyan

sham ruKHsat ho rahi hai raat ka munh chum kar

ho rahi hain charKH par taron mein kuchh sargoshiyan

jalwe hain betab parde se nikalne ke liye

ban sanwar kar aa rahi hain aasman ki raniyan

nau urus-e-shab ne pahna hai libas-e-faKHira

aasmani pairahan mein kahkashani dhaariyan

karchobi shamiyane mein rachi bazm-e-nashat

saz ne angDai li bajne lagi hain taliyan

la-jawrdi farsh par hai mushtari zohra ka raqs

nail-tan krishn ke pahlu mein machalti gopiyan

dast-o-pa ki narm wa KHush-ahang halki junbishen

ya faza mein nachti hain gungunati bijliyan

sarmadi naghmat se sari faza mamur hai

nutq-e-rab-e-zul-minan hain raat ki KHamoshiyan

nind si aaankhon mein aati hai jhuka jata hai sar

sun raha tha der se main aasmani loriyan