aastin ka sanp

ye kis ne bā-vafā hindostāñ se bevafā.ī kī

bhalā.ī chāhne vaale se ye kis ne burā.ī kī

ye kis ne aaḌ le kar hindī-chīnī-bhā.ī-bhā.ī kī

zamīn-e-hind ke laddāḳh-o-nefā par chaḌhā.ī kī

are ye chiin hai vo chiin jo zillat kā maarā thā

use ham ne navāzā thā use ham ne ubhārā thā

use sadiyoñ se dī hai apne dāman kī havā ham ne

use paalā use posā javāñ us ko kiyā ham ne

use jiinā sikhāyā aur diyā dars-e-vafā ham ne

use insāniyat baḳhshī use gautam diyā ham ne

nahīñ mā'lūm thā ye chiin hai aur dil kā kaalā hai

ham ab samjhe ki ham ne āstīñ meñ saañp paalā hai

are o chiin bad-niyyat ye āḳhir kyā kiyā tū ne

miTā dī hind kī baḳhshī huī rasm-e-vafā tū ne

milā dī ḳhaak meñ sab aabrū tū ne hayā tū ne

ḳhud apne amn ke nā'roñ ko rusvā kar liyā tū ne

laḌā.ī chheḌ kar tū bā-vaqār ab ho nahīñ saktā

kisī hālat meñ terā e'tibār ab ho nahīñ saktā

jo laḌnā hī thā apne chiang-Kai-shek se laḌ jaatā

tirā ik formosa thā use lene pe aḌ jaatā

koī gar roktā to haq jatātā aur akaḌ jaatā

hamārā vote bhī shāyad ki tere haq meñ paḌ jaatā

magar tujh ko tirī bad-baḳhtiyoñ ne aisā gherā hai

ki terā ruḳh muqaddar ne hamārī samt pherā hai

ḳhabar bhī hai tujhe ye hind hai vīroñ kī dhartī hai

jo kas letī hai mashkeñ aisī zanjīroñ kī dhartī hai

ye 'rānī-laxmī-bā.ī' kī shamshīroñ kī dhartī hai

chalā.e the jo arjun ne ye un tīroñ kī dhartī hai

kisī sūrat yahāñ se bach ke jaanā ġhair-mumkin hai

hamāre hind kā chūke nishāna ġhair-mumkin hai

baḌho ai bhārtī viiro phir apnī saakh manvāo

ghaTā ban kar uḌo aur uḌ ke ran bhūmī pe chhā jaao

girāo bijliyoñ par bijliyāñ aur aag barsāo

vatan ko dushmanoñ se paak karne kī qasam khaao

qasam khaao ki bhārat-māñ kī tum ko laaj rakhnā hai

himāla kī bulandī par tirangā taaj rakhnā hai

ye maanā rāste kuchh pur-ḳhatar haiñ aur kaThin bhī haiñ

tumhīñ meñ mard-e-maidāñ haiñ tumhīñ meñ kohkan bhī haiñ

hai Dar kaisā tumhāre ham-safar jab ahl-e-fan bhī haiñ

tumhāre saath shā'ir bhī haiñ aur in meñ 'chaman' bhī haiñ

ye badla chiin se ik baar kyā sau baar le leñge

qalam ab pheñk deñge haath meñ talvār le leñge

ye kis ne ba-wafa hindostan se bewafai ki

bhalai chahne wale se ye kis ne burai ki

ye kis ne aaD le kar hindi-chini-bhai-bhai ki

zamin-e-hind ke laddaKH-o-nefa par chaDhai ki

are ye chin hai wo chin jo zillat ka mara tha

use hum ne nawaza tha use hum ne ubhaara tha

use sadiyon se di hai apne daman ki hawa hum ne

use pala use posa jawan us ko kiya hum ne

use jina sikhaya aur diya dars-e-wafa hum ne

use insaniyat baKHshi use gautam diya hum ne

nahin ma'lum tha ye chin hai aur dil ka kala hai

hum ab samjhe ki hum ne aastin mein sanp pala hai

are o chin bad-niyyat ye aaKHir kya kiya tu ne

miTa di hind ki baKHshi hui rasm-e-wafa tu ne

mila di KHak mein sab aabru tu ne haya tu ne

KHud apne amn ke na'ron ko ruswa kar liya tu ne

laDai chheD kar tu ba-waqar ab ho nahin sakta

kisi haalat mein tera e'tibar ab ho nahin sakta

jo laDna hi tha apne chiang-Kai-shek se laD jata

tera ek formosa tha use lene pe aD jata

koi gar rokta to haq jatata aur akaD jata

hamara wote bhi shayad ki tere haq mein paD jata

magar tujh ko teri bad-baKHtiyon ne aisa ghera hai

ki tera ruKH muqaddar ne hamari samt phera hai

KHabar bhi hai tujhe ye hind hai wiron ki dharti hai

jo kas leti hai mashken aisi zanjiron ki dharti hai

ye 'rani-laxmi-bai' ki shamshiron ki dharti hai

chalae the jo arjun ne ye un tiron ki dharti hai

kisi surat yahan se bach ke jaana ghair-mumkin hai

hamare hind ka chuke nishana ghair-mumkin hai

baDho ai bhaarti wiro phir apni sakh manwao

ghaTa ban kar uDo aur uD ke ran bhumi pe chha jao

girao bijliyon par bijliyan aur aag barsao

watan ko dushmanon se pak karne ki qasam khao

qasam khao ki bhaarat-man ki tum ko laj rakhna hai

himala ki bulandi par tiranga taj rakhna hai

ye mana raste kuchh pur-KHatar hain aur kaThin bhi hain

tumhin mein mard-e-maidan hain tumhin mein kohkan bhi hain

hai Dar kaisa tumhaare ham-safar jab ahl-e-fan bhi hain

tumhaare sath sha'ir bhi hain aur in mein 'chaman' bhi hain

ye badla chin se ek bar kya sau bar le lenge

qalam ab phenk denge hath mein talwar le lenge