aaTa

hazrat aadam pe jo guzrī hai sab ko yaad hai

dāna-e-gandum kī zinda aaj tak be-dād hai

aaj phir aulād-e-ādam par vahī uftād hai

is kā baanī bhī farishtoñ kā vahī ustād hai

daur daura aaj is kā chor-bāzāroñ meñ hai

māherīn-e-chor-bāzārī ke ġham-ḳhvāroñ meñ hai

un meñ dekhā is kā jalva jo zaḳhīra-bāz haiñ

dafn tah-ḳhānoñ meñ jin ke boriyoñ ke raaz haiñ

boriyoñ se milte-julte toñd ke andāz haiñ

aur fariyād-o-bukā meñ sab ke ham-āvāz haiñ

toñd par hai haath aur fāqoñ se hālat zaar hai

in ko īñdhan is jahannam ke liye darkār hai

ho gayā bāzār se aaTe kā aisā intiqāl

ab khule bāzār meñ aaTe kā milnā hai muhāl

ik zaḳhīra-bāz maulānā-numā dūkān-dār

qaum ke is ibtilā se kal bahut the be-qarār

aah is millat kā kyuuñ gehūñ pe hai dār-o-madār

kaash khātī bājrā yā kaash ye khātī javār

is ke khāne ke liye nemat har ik maujūd hai

dāna-e-gandum bhalā kyuuñ gauhar-e-maqsūd hai

sach jo pūchho to kahūñ shaitān kā ration hai ye

jis ne jannat luuT lī insāñ kā vo dushman hai ye

haif hai insān kar de is par jannat tak nisār

sab ko gandum se bachānā ai mire parvardigār

saiñkaḌoñ man yuuñ to gehūñ mere tah-ḳhāne meñ hai

aur mazā bhī kyā mujhe āzār pahchāne meñ hai

mere hisse kī vahī mai hai jo paimāne meñ hai

haañ magar dozaḳh jo hai gehūñ ke parvāne meñ hai

jis ne gehūñ khā liyā dozaḳh meñ gole khā.egā

jis ko jannat chāhiye vo sirf chhole khā.egā

hazrat aadam pe jo guzri hai sab ko yaad hai

dana-e-gandum ki zinda aaj tak be-dad hai

aaj phir aulad-e-adam par wahi uftad hai

is ka bani bhi farishton ka wahi ustad hai

daur daura aaj is ka chor-bazaron mein hai

maherin-e-chor-bazari ke gham-KHwaron mein hai

un mein dekha is ka jalwa jo zaKHira-baz hain

dafn tah-KHanon mein jin ke boriyon ke raaz hain

boriyon se milte-julte tond ke andaz hain

aur fariyaad-o-buka mein sab ke ham-awaz hain

tond par hai hath aur faqon se haalat zar hai

in ko indhan is jahannam ke liye darkar hai

ho gaya bazar se aaTe ka aisa intiqal

ab khule bazar mein aaTe ka milna hai muhaal

ek zaKHira-baz maulana-numa dukan-dar

qaum ke is ibtila se kal bahut the be-qarar

aah is millat ka kyun gehun pe hai dar-o-madar

kash khati bajra ya kash ye khati jawar

is ke khane ke liye nemat har ek maujud hai

dana-e-gandum bhala kyun gauhar-e-maqsud hai

sach jo puchho to kahun shaitan ka ration hai ye

jis ne jannat luT li insan ka wo dushman hai ye

haif hai insan kar de is par jannat tak nisar

sab ko gandum se bachana ai mere parwardigar

sainkaDon man yun to gehun mere tah-KHane mein hai

aur maza bhi kya mujhe aazar pahchane mein hai

mere hisse ki wahi mai hai jo paimane mein hai

han magar dozaKH jo hai gehun ke parwane mein hai

jis ne gehun kha liya dozaKH mein gole khaega

jis ko jannat chahiye wo sirf chhole khaega