aatish-e-KHamosh

sar-chashma-e-aḳhlāq vafā-kesh-o-vafā-kosh

ai mashriq-e-ishrāq-e-safā abr-e-ḳhatā-posh

yuuñ tere dil-e-sāf meñ ishrāq-e-mohabbat

jis tarah ki lau sub.h ko de durr-e-nayā-gosh

maiñ kaun huuñ ik dil huuñ jise zabt ne maarā

kar degī fanā mujh ko mirī koshish-e-ḳhāmosh

vo dil huuñ ibārat jo hai nazm-e-abadī se

ik ḳhuun kā nuqta huuñ maiñ pur-ma.anī-o-pur-josh

jibrīl mire saath rahe roz-e-azal se

mai-ḳhān-e-irfāñ meñ shab-o-roz qadah-nosh

kuchh muñh se nikal jaa.eñ na samjhī huī bāteñ

rahne do mujhe majlis-e-mai meñ yūñhī mad.hosh

sarsabz huuñ zāhir meñ magar ai dil-e-ḳhūñ-garm

jis tarah hinā meñ hai nihāñ ātish-e-ḳhāmosh

dil par ye sitam kyuuñ na ho ham-jins pe tāsīr

ka.aba isī ġham meñ nazar aatā hai siyah-posh

ayyūb nahīñ huuñ koī ma.asūm nahīñ huuñ

tā-chand mazālim pe rahūñ sākit-o-ḳhamosh

haiñ jitne aqārib vo aqārib se haiñ bad-tar

ahbāb haiñ vo ḳhud-ġharaz-o-zūd-farāmosh

dil saaf nahīñ sab haiñ suḳhan-sāz-o-suḳhan-chīñ

ye mehr to hai zahr agar niish meñ ho nosh

kahte haiñ jise dost vo is daur meñ anqā

samjhe haiñ jise mehr vo is ahd meñ rū-posh

kis daur meñ aa.e haiñ ham ai majlis-e-sāqī

jab riñd-e-ḳharābāt-nashīñ ho ga.e mad.hosh

dil kyā mirī āñkhoñ kā hai TuuTā huā sotā

tūfān uThā deñge yahī chashma-e-ḳhas-posh

Thokar se jilātā huuñ mazāmīn-e-kuhan ko

hai fitna-e-mahshar mirī utrī huī pā-posh

ham-sañg javāhir kabhī patthar nahīñ hotā

har chand tarāshe koī sannā-e-safā-kosh

go mujh ko ḳhudā-dād tabī.at ne sañvārā

mujrim huuñ agar huuñ kabhī ehsān-farāmosh

tarkash meñ mire tiir bahut kam haiñ magar haiñ

aise ki uḌā deñ qadar-andāz ke jo hosh

pindār-e-ḳhudī hai aziiz un ko to hameñ kiyā

ham ishq ke bande haiñ vafā-kesh-o-vafā-kosh

sar-chashma-e-aKHlaq wafa-kesh-o-wafa-kosh

ai mashriq-e-ishraq-e-safa abr-e-KHata-posh

yun tere dil-e-saf mein ishraq-e-mohabbat

jis tarah ki lau subh ko de durr-e-naya-gosh

main kaun hun ek dil hun jise zabt ne mara

kar degi fana mujh ko meri koshish-e-KHamosh

wo dil hun ibarat jo hai nazm-e-abadi se

ek KHun ka nuqta hun main pur-mani-o-pur-josh

jibril mere sath rahe roz-e-azal se

mai-KHan-e-irfan mein shab-o-roz qadah-nosh

kuchh munh se nikal jaen na samjhi hui baaten

rahne do mujhe majlis-e-mai mein yunhi madhosh

sarsabz hun zahir mein magar ai dil-e-KHun-garm

jis tarah hina mein hai nihan aatish-e-KHamosh

dil par ye sitam kyun na ho ham-jins pe tasir

kaba isi gham mein nazar aata hai siyah-posh

ayyub nahin hun koi masum nahin hun

ta-chand mazalim pe rahun sakit-o-KHamosh

hain jitne aqarib wo aqarib se hain bad-tar

ahbab hain wo KHud-gharaz-o-zud-faramosh

dil saf nahin sab hain suKHan-saz-o-suKHan-chin

ye mehr to hai zahr agar nish mein ho nosh

kahte hain jise dost wo is daur mein anqa

samjhe hain jise mehr wo is ahd mein ru-posh

kis daur mein aae hain hum ai majlis-e-saqi

jab rind-e-KHarabaat-nashin ho gae madhosh

dil kya meri aankhon ka hai TuTa hua sota

tufan uTha denge yahi chashma-e-KHas-posh

Thokar se jilata hun mazamin-e-kuhan ko

hai fitna-e-mahshar meri utri hui pa-posh

ham-sang jawahir kabhi patthar nahin hota

har chand tarashe koi sanna-e-safa-kosh

go mujh ko KHuda-dad tabiat ne sanwara

mujrim hun agar hun kabhi ehsan-faramosh

tarkash mein mere tir bahut kam hain magar hain

aise ki uDa den qadar-andaz ke jo hosh

pindar-e-KHudi hai aziz un ko to hamein kiya

hum ishq ke bande hain wafa-kesh-o-wafa-kosh