aawagawan

īsā-e-ashk ne chamkā.ī hai palkoñ kī salīb

pyaar ne dard kī injīl ko dohrāyā hai

phir kisī yaad kā jaltā huā pāgal jhoñkā

mere sūkhe hue hoñToñ ke qarīb aayā hai

aaj phir aañkh kī badnām guzar-gāhoñ par

ruk gayā hai koī chalte hue jalvoñ kā sarāb

aañkh ab ḳhvāb kī jumbish bhī nahīñ sah saktī

ab koī vajh-e-takalluf na koī rasm-e-hijāb

dil ki ik kāñch kī chūḌī se bhī nāzuk Thahrā

kis tarah itnī baḌī choT ko sah saktā hai

jo kabhī arsh-e-mohabbat se na nīche utrā

kis tarah maut ke tah-ḳhāne meñ rah saktā hai

ye añdherā ye pighaltā huā shab rang-e-sukūt

mere ehsās kī har mauj meñ Dhal jaane de

āḳhirī saañs kī talvār bhī chal jaane de

mujh ko is hirs kī bastī se nikal jaane de

vahī sangam vahī taqdīr kā pahlā sangam

tum jahāñ mujh se mile the maiñ vahīñ jā.ūñgā

ye judā.ī to faqat saañs kā ik vaqfa hai

mere mahbūb na ghabrāo maiñ phir ā.ūñgā

isa-e-ashk ne chamkai hai palkon ki salib

pyar ne dard ki injil ko dohraya hai

phir kisi yaad ka jalta hua pagal jhonka

mere sukhe hue honTon ke qarib aaya hai

aaj phir aankh ki badnam guzar-gahon par

ruk gaya hai koi chalte hue jalwon ka sarab

aankh ab KHwab ki jumbish bhi nahin sah sakti

ab koi wajh-e-takalluf na koi rasm-e-hijab

dil ki ek kanch ki chuDi se bhi nazuk Thahra

kis tarah itni baDi choT ko sah sakta hai

jo kabhi arsh-e-mohabbat se na niche utra

kis tarah maut ke tah-KHane mein rah sakta hai

ye andhera ye pighalta hua shab rang-e-sukut

mere ehsas ki har mauj mein Dhal jaane de

aaKHiri sans ki talwar bhi chal jaane de

mujh ko is hirs ki basti se nikal jaane de

wahi sangam wahi taqdir ka pahla sangam

tum jahan mujh se mile the main wahin jaunga

ye judai to faqat sans ka ek waqfa hai

mere mahbub na ghabrao main phir aaunga