aawaz ke moti

sher ke jādūgar sañgīt ke sāhir

misroñ aur dhunoñ ke ḳhālī sīpoñ ke kashkol uThā.e

afsurda maġhmūm khaḌe haiñ

suunī āñkhoñ meñ TuuTī ummīd liye

āvāz ke un nauras qatroñ kī

jo ḳhālī sīpoñ meñ amrit ban kar Tapkeñ

aur iz.hār guhar ban jaa.e

lafz kī bandish taal kī sañgat raqs ke tevar

be-harkat be-jān dhare haiñ

un hoñToñ kī hasrat meñ

jin kī pechīda tarsīl ḳhamīda jumbish

saut o bayāñ ko ma.anī kī sau jihteñ baḳhshā kartī thī

yaad meñ us pur-nūr dahan kī

jis se ubaltī tah-dar-tah āvāz ke raushan jaadū se

shabd suroñ meñ ghul jaate the

nok-e-qalam se barbat ke tāroñ tak jalte daaġh

āb-e-sadā se dhul jaate the

(us ke dilkash giit havāoñ ke hoñToñ par sadiyoñ tak mahfūz raheñge)

shor bharī duniyā kī dukhī tanhā.ī meñ

umr kī jis manzil pe jis jīvan kī Dagar par

jazboñ kī jis rāhguzar par

dil kā musāfir pal-do-pal ko Thahregā

us kī sadā ke hamdam haath

bujhī huī bezār samā.at ke shāne thapkeñge

man kā dukh bāñTeñge

rañj ḳhushī mausam tyauhār

vasl judā.ī dard qarār

ummīdoñ kī mastī TuuTe ḳhvāboñ kī uljhan

zulm baġhāvat gaañv vatan

ahd-e-kuhan ke ramz na.e yug kī tafsīreñ

ishq ibādat ā.īna-ḳhāne tanvīreñ

har ghar har mahfil us kī āvāz ke motī

bām-e-havā se barseñge

aah magar

alfāz kī bandish taal kī sañgat raqs ke tevar

us ke dhun ke na.e ujāloñ na.e ufuq ko

rahtī duniyā tak tarseñge

sher ke jadugar sangit ke sahir

misron aur dhunon ke KHali sipon ke kashkol uThae

afsurda maghmum khaDe hain

suni aankhon mein TuTi ummid liye

aawaz ke un nauras qatron ki

jo KHali sipon mein amrit ban kar Tapken

aur izhaar guhar ban jae

lafz ki bandish tal ki sangat raqs ke tewar

be-harkat be-jaan dhare hain

un honTon ki hasrat mein

jin ki pechida tarsil KHamida jumbish

saut o bayan ko mani ki sau jihten baKHsha karti thi

yaad mein us pur-nur dahan ki

jis se ubalti tah-dar-tah aawaz ke raushan jadu se

shabd suron mein ghul jate the

nok-e-qalam se barbat ke taron tak jalte dagh

aab-e-sada se dhul jate the

(us ke dilkash git hawaon ke honTon par sadiyon tak mahfuz rahenge)

shor bhari duniya ki dukhi tanhai mein

umr ki jis manzil pe jis jiwan ki Dagar par

jazbon ki jis rahguzar par

dil ka musafir pal-do-pal ko Thahrega

us ki sada ke hamdam hath

bujhi hui bezar samaat ke shane thapkenge

man ka dukh banTenge

ranj KHushi mausam tyauhaar

wasl judai dard qarar

ummidon ki masti TuTe KHwabon ki uljhan

zulm baghawat ganw watan

ahd-e-kuhan ke ramz nae yug ki tafsiren

ishq ibaadat aaina-KHane tanwiren

har ghar har mahfil us ki aawaz ke moti

baam-e-hawa se barsenge

aah magar

alfaz ki bandish tal ki sangat raqs ke tewar

us ke dhun ke nae ujalon nae ufuq ko

rahti duniya tak tarsenge