aawezish

aaj phir us se mulāqāt huī

baaġh ke maġhribī goshe meñ jhuke niim ke chhitnār tale

ek bad-rañg sī chādar pe vo baiThā thā mujhe dekh ke sarshār huā

bhaa.ī kaise ho! nazar tum kabhī aate hī nahīñ

aao kuchh der mire paas to baiTho dekho

kaisā chup-chāp hai ye baaġh kā gosha jaise

kisī mavvāj samundar meñ jazīra koī

duur vo surma.ī bādal kī farozāñ jhālar

jaise haañ jaise magar ḳhair koī baat nahīñ

aao tum paas to baiTho mere

aur maiñ chupke se chādar pe vahīñ baiTh gayā

us ke hoñToñ se utarte hue alfāz kī chahkār meñ tā-der maiñ ḳhāmosh rahā

kaisī chahkār thī vo ḳhushk peḌoñ meñ havā kā nauha

jaise girte hue pattoñ kī lagātār sadā

daf.atan soch ke ik ajnabī jhoñke ne mujhe chheḌ diyā

jaane kab se ye musāfir hai jazīre meñ muqayyad tanhā

muntazir aa.egī ik roz kahīñ se naav

bādbāñ abr kā chāñdī ke chamakte chappū

rasmasātī huī ik narm rasīlī āvāz

tū kahāñ hai tū kahāñ hai ki tujhe

DhūñDte DhūñDte maiñ haar ga.ī haar ga.ī

aur bad-rañg sī chādar pe vo baiThā huā shaḳhs

ḳhvāb meñ boltā jaatā thā siyah baasī lafz

us ke sūkhe hue hoñToñ se nikal kar har sū

jhūTe sikkoñ kā banāte chale jaate the hisār

aaj phir us se mulāqāt huī

vahīñ us baaġh ke goshe meñ jhuke niim ke chhitnār tale

aaj phir us se mulāqāt huī

aaj phir us se mulaqat hui

bagh ke maghribi goshe mein jhuke nim ke chhitnar tale

ek bad-rang si chadar pe wo baiTha tha mujhe dekh ke sarshaar hua

bhai kaise ho! nazar tum kabhi aate hi nahin

aao kuchh der mere pas to baiTho dekho

kaisa chup-chap hai ye bagh ka gosha jaise

kisi mawwaj samundar mein jazira koi

dur wo surmai baadal ki farozan jhaalar

jaise han jaise magar KHair koi baat nahin

aao tum pas to baiTho mere

aur main chupke se chadar pe wahin baiTh gaya

us ke honTon se utarte hue alfaz ki chahkar mein ta-der main KHamosh raha

kaisi chahkar thi wo KHushk peDon mein hawa ka nauha

jaise girte hue patton ki lagatar sada

dafatan soch ke ek ajnabi jhonke ne mujhe chheD diya

jaane kab se ye musafir hai jazire mein muqayyad tanha

muntazir aaegi ek roz kahin se naw

baadban abr ka chandi ke chamakte chappu

rasmasati hui ek narm rasili aawaz

tu kahan hai tu kahan hai ki tujhe

DhunDte DhunDte main haar gai haar gai

aur bad-rang si chadar pe wo baiTha hua shaKHs

KHwab mein bolta jata tha siyah basi lafz

us ke sukhe hue honTon se nikal kar har su

jhuTe sikkon ka banate chale jate the hisar

aaj phir us se mulaqat hui

wahin us bagh ke goshe mein jhuke nim ke chhitnar tale

aaj phir us se mulaqat hui