KHwab

kitne ḳhūbsūrat hote haiñ nā

aur thoḌe sar-phire bhī

ye chalnā nahīñ chāhte

bas uḌnā chāhte haiñ

bharnā chāhte haiñ

ek aisī uḌaan

jahāñ zamīn kī haqīqat ho

aur āsmāñ ke paar kī kalpanā bhī

jahāñ vaqt sā Thaharnā ho

aur ḳhushbū sā bikharnā bhī

ye sajnā chāhte haiñ

sañvarnā chāhte haiñ

ḳhud meñ bharte haiñ rañg

le kar titliyoñ se udhār

chamak uThte haiñ

ḳhud ko chāñdnī se sañvār

Tāñkte haiñ kuchh ujle sitāre bhī

phir tākte haiñ ā.eñge din hamāre bhī

dekhte haiñ har nazar meñ hazāroñ savāl

kahte haiñ ḳhud se na Dar tū sambhāl

din meñ sajte haiñ shauq se

ḳhvāhish ke bāzāroñ meñ

rātoñ meñ bahte haiñ ḳhauf se

ashkoñ ke dhāroñ meñ

bahut ḳhush-nasīb hotī hai vo āñkheñ

jin meñ ḳhvāb rahte haiñ

haiñ mukammal vo ashk bhī

jin meñ ḳhvāb bahte haiñ

kitne KHubsurat hote hain na

aur thoDe sar-phire bhi

ye chalna nahin chahte

bas uDna chahte hain

bharna chahte hain

ek aisi uDan

jahan zamin ki haqiqat ho

aur aasman ke par ki kalpana bhi

jahan waqt sa Thaharna ho

aur KHushbu sa bikharna bhi

ye sajna chahte hain

sanwarna chahte hain

KHud mein bharte hain rang

le kar titliyon se udhaar

chamak uThte hain

KHud ko chandni se sanwar

Tankte hain kuchh ujle sitare bhi

phir takte hain aaenge din hamare bhi

dekhte hain har nazar mein hazaron sawal

kahte hain KHud se na Dar tu sambhaal

din mein sajte hain shauq se

KHwahish ke bazaron mein

raaton mein bahte hain KHauf se

ashkon ke dhaaron mein

bahut KHush-nasib hoti hai wo aankhen

jin mein KHwab rahte hain

hain mukammal wo ashk bhi

jin mein KHwab bahte hain