aaya hai naya sal

iThlātā huā jhuum ke aaya hai nayā saal

lahrātā huā jhuum ke aaya hai nayā saal

aaya hai nayā saal

ai sa.ī-e-musalsal tire e.ajāz ke sadqe

hāsil ko ga.e saal kī me.arāj mubārak

kirnoñ se añdhere kī qabā kholne vaale

āġhāz ko is saal kā ye aaj mubārak

paiġhām ka.ī tarah ke laayā hai nayā saal

in.aam ka.ī tarah ke laayā hai nayā saal

aaya hai nayā saal

be-laus mohabbat ke uḳhuvvat ke karam se

har samt jidhar dekheñ masarrat kī fazā hai

afsāna-e-jamhūr kī rangīn haqīqat

tahzīb-o-tamaddun kī muravvat kī fazā hai

har dil ke rag-o-resha pe chhāyā hai nayā saal

har zehn ke ā.īne pe chhāyā hai nayā saal

aaya hai nayā saal

paikar the rifāqat ke vatan-dost sarāsar

maidān-e-taraqqī meñ hamesha jo baham the

chalte rahe har haal salābat kī Dagar par

vābasta-e-manzil vo hamāre hī qadam the

jhelā hai jo ik saal to paayā hai nayā saal

khoyā hai jo ik saal to paayā hai nayā saal

aaya hai nayā saal

nairangī-e-afkār-o-aqā.ed se labālab

har chand rañgā-rang hai paimāna-e-jamhūr

ik rūh-e-vatan husn-e-saqāfat ke karam se

yak-rang hī yak-rang hai mai-ḳhāna-e-jamhūr

kirdār-e-musāvāt kā jaayā hai nayā saal

ik-tarfa karāmāt kā jaayā hai nayā saal

aaya hai nayā saal

lāzim hai ki a.amāl ko ik aisī adā deñ

jamhūr ke kirdār ko kuchh aur uThā deñ

nafrat ko ta.assub ko tah-e-ḳhāk sulā deñ

tafrīq kā taḳhrīb kā har naqsh miTā deñ

har tesha-e-ta.amīr ko mehnat kī jilā deñ

tadbīr se jamhūr kī taqdīr banā deñ

ham kyā haiñ sar-e-dast zamāne ko batā deñ

har ḳhvāb ko ta.abīr kī sarhad se milā deñ

kis aan se kis baan se aaya hai nayā saal

haañ dekhiye kis shaan se aaya hai nayā saal

aaya hai nayā saal

aaya hai nayā saal

iThlata hua jhum ke aaya hai naya sal

lahraata hua jhum ke aaya hai naya sal

aaya hai naya sal

ai sai-e-musalsal tere eajaz ke sadqe

hasil ko gae sal ki mearaj mubarak

kirnon se andhere ki qaba kholne wale

aaghaz ko is sal ka ye aaj mubarak

paigham kai tarah ke laya hai naya sal

inam kai tarah ke laya hai naya sal

aaya hai naya sal

be-laus mohabbat ke uKHuwwat ke karam se

har samt jidhar dekhen masarrat ki faza hai

afsana-e-jamhur ki rangin haqiqat

tahzib-o-tamaddun ki murawwat ki faza hai

har dil ke rag-o-resha pe chhaya hai naya sal

har zehn ke aaine pe chhaya hai naya sal

aaya hai naya sal

paikar the rifaqat ke watan-dost sarasar

maidan-e-taraqqi mein hamesha jo baham the

chalte rahe har haal salabat ki Dagar par

wabasta-e-manzil wo hamare hi qadam the

jhela hai jo ek sal to paya hai naya sal

khoya hai jo ek sal to paya hai naya sal

aaya hai naya sal

nairangi-e-afkar-o-aqaed se labaalab

har chand ranga-rang hai paimana-e-jamhur

ek ruh-e-watan husn-e-saqafat ke karam se

yak-rang hi yak-rang hai mai-KHana-e-jamhur

kirdar-e-musawat ka jaya hai naya sal

ik-tarfa karamat ka jaya hai naya sal

aaya hai naya sal

lazim hai ki aamal ko ek aisi ada den

jamhur ke kirdar ko kuchh aur uTha den

nafrat ko tassub ko tah-e-KHak sula den

tafriq ka taKHrib ka har naqsh miTa den

har tesha-e-tamir ko mehnat ki jila den

tadbir se jamhur ki taqdir bana den

hum kya hain sar-e-dast zamane ko bata den

har KHwab ko tabir ki sarhad se mila den

kis aan se kis ban se aaya hai naya sal

han dekhiye kis shan se aaya hai naya sal

aaya hai naya sal

aaya hai naya sal