آزاد ہند فوج

اے جیش‌ سرفروش جوانان خوش نہاد

سینے پہ تیرے کند ہوئی تیغ اشتداد

غربت میں دی ہے تو نے شجاعت کی خوب داد

اقوام دہر کرتی ہیں جرأت پہ تیری صاد

تو کامگار ہو ترے دشمن ہوں نامراد

ہندوستاں کی فوج ظفر موج زندہ باد

دریا و دشت و کوہ میں تیرا بگل بجے

جس کی صدا سے گنبد گردوں بھی گونج اٹھے

میداں میں موت بھی ہو مجسم جو سامنے

تیرے دلاوروں کے نہ ہوں پست حوصلے

ہو بلکہ ان کا جوش عمل اور بھی زیاد

ہندوستاں کی فوج ظفر موج زندہ باد

پردیس میں جو کھیت رہے ہیں جواں ترے

ہیں دفن زیر خاک خزانے وہاں ترے

برما کے جنگلوں میں لہو کے نشاں ترے

نقش دوام ہیں وہ تہہ آسماں ترے

تا‌ روز حشر اہل وطن کو رہیں گے یاد

ہندوستاں کی فوج ظفر موج زندہ باد

غالب تھا بسکہ ساحر افرنگ کا فسوں

دو سو برس سے تھا علم‌ ہند سرنگوں

تو نے دیار غیر میں دکھلا دیا کہ یوں

مردان کار کرتے ہیں باطل کو غرق خوں

باطل ہو خواہ کوہ گراں خواہ گرد باد

ہندوستاں کی فوج‌ ظفر موج زندہ باد