aazad-hind fauj

ai jaish-e-sarfarosh-javānān-e-ḳhush-nihād

siine pe tere kund huī teġh-e-ishtidād

ġhurbat meñ dī hai tū ne shujā.at kī ḳhuub daad

aqvām-e-dahr kartī haiñ jur.at pe terī saad

tū kāmgār ho tire dushman huuñ nā-murād

hindostāñ kī fauj-e-zafar-mauj zindabād

dariyā-o-dasht-o-koh meñ terā bigul baje

jis kī sadā se gumbad-e-gardūñ bhī guuñj uThe

maidāñ meñ maut bhī ho mujassam jo sāmne

tere dilāvaroñ ke na hoñ past hausle

ho balki un kā josh-e-amal aur bhī ziyād

hindostāñ kī fauj-e-zafar-mauj zindabād

pardes meñ jo khet rahe haiñ javāñ tire

haiñ dafn zer-e-ḳhāk ḳhazāne vahāñ tire

barmā ke jangaloñ meñ lahū ke nishāñ tire

naqsh-e-davām haiñ vo tah-e-āsmāñ tire

tā-roz-e-hashr ahl-e-vatan ko raheñge yaad

hindostāñ kī fauj-e-zafar-mauj zindabād

ġhālib thā bas-ki sāhir-e-afrang kā fusūñ

do sau baras se thā alam-e-hind sar-nigūñ

tū ne dayār-e-ġhair meñ dikhlā diyā ki yuuñ

mardān-kār karte haiñ bātil ko ġharq-e-ḳhūñ

bātil ho ḳhvāh koh-e-girāñ ḳhvāh gard-bād

hindostāñ kī fauj-e-zafar-mauj zindabād

ai jaish-e-sarfarosh-jawanan-e-KHush-nihad

sine pe tere kund hui tegh-e-ishtidad

ghurbat mein di hai tu ne shujaat ki KHub dad

aqwam-e-dahr karti hain jurat pe teri sad

tu kaamgar ho tere dushman hun na-murad

hindostan ki fauj-e-zafar-mauj zindabaad

dariya-o-dasht-o-koh mein tera bigul baje

jis ki sada se gumbad-e-gardun bhi gunj uThe

maidan mein maut bhi ho mujassam jo samne

tere dilawaron ke na hon past hausle

ho balki un ka josh-e-amal aur bhi ziyaad

hindostan ki fauj-e-zafar-mauj zindabaad

pardes mein jo khet rahe hain jawan tere

hain dafn zer-e-KHak KHazane wahan tere

barma ke jangalon mein lahu ke nishan tere

naqsh-e-dawam hain wo tah-e-asman tere

ta-roz-e-hashr ahl-e-watan ko rahenge yaad

hindostan ki fauj-e-zafar-mauj zindabaad

ghaalib tha bas-ki sahir-e-afrang ka fusun

do sau baras se tha alam-e-hind sar-nigun

tu ne dayar-e-ghair mein dikhla diya ki yun

mardan-kar karte hain baatil ko gharq-e-KHun

baatil ho KHwah koh-e-giran KHwah gard-baad

hindostan ki fauj-e-zafar-mauj zindabaad