آزادی

بہار آئی ہے گلشن شادماں ہے

بہت رنگیں چمن کی داستاں ہے

ہجوم نازنین و مہ وشاں ہے

ترنگے کو ذرا اونچا اٹھاؤ

رفیقو جشن آزادی مناؤ

تمہیں سے قوم کی ہے جاہ و حشمت

تمہیں سے ہے وطن کی شان و عظمت

تمہیں دینا ہے اب درس محبت

قدم اک ساتھ سب مل کر بڑھاؤ

رفیقو جشن آزادی مناؤ

مٹا دو بغض و کینہ فتنہ و شر

وہ غنچہ ہو کہ کانٹا یا گل تر

برابر سب کا حق ہے گلستاں پر

یہی سب سے کہو سب کو بتاؤ

رفیقو جشن آزادی مناؤ

سنوارو اس طرح سے صحن گلشن

رہیں مل جل کے سب شیخ و برہمن

ہو گوشہ گوشہ اس دھرتی کا روشن

اہنسا کا سبق سیکھو سکھاؤ

رفیقو جشن آزادی مناؤ

مٹا دو ہند سے بے روزگاری

نیا فن ہو نئی ہو دست کاری

تجارت میں بڑھے شہرت تمہاری

وطن کو اپنے اک جنت بناؤ

رفیقو جشن آزادی مناؤ

محافظ ہو نگہبان چمن ہو

تمہیں تو جان و روح انجمن ہو

سکھانا کیا تمہیں تم اہل فن ہو

چراغ فکر و فن سے نور لاؤ

رفیقو جشن آزادی مناؤ