aazadi ke diwane

ham āzādī ke dīvāne ye duniyā farzānoñ kī

is paapī sansār meñ baabā kaun sune dīvānoñ kī

masjid mandir sab ke andar raaj ġhulāmī kartī hai

daulat le kar naam ḳhudā kā ghar ghar dharnā dhartī hai

koThī bañgle gore sāñpoñ kī ik aisī bastī hai

jo bhārat ke bhole-bhāle insānoñ ko Dastī hai

un se bach kar chalnā baabā ye qātil zahrīle haiñ

sūrat ke mohan haiñ bhītar se sab niile piile haiñ

shaidā huuñ āzādī kā āzād-nagar meñ Derā hai

kyā batlā.ūñ mere bhayyā kaun jahāñ meñ merā hai

vo merā jo āzādī kī zulfoñ kā dīvāna hai

vo merā jo sham-e-vatan kā shaidā.ī parvāna hai

vo merā jo maut ke aage be-jigarī se tantā hai

vo merā jo aap na ho kuchh jis kī sab kuchh jantā hai

vo merā jo hañste hañste phāñsī par chaḌh jaatā hai

vo merā jo maut se bhī do chaar qadam baḌh jaatā hai

āzādī ke tālib sun le maut hī merī manzil hai

tū duniyā kā ban saktā hai merā banñā mushkil hai

hum aazadi ke diwane ye duniya farzanon ki

is papi sansar mein baba kaun sune diwanon ki

masjid mandir sab ke andar raj ghulami karti hai

daulat le kar nam KHuda ka ghar ghar dharna dharti hai

koThi bangle gore sanpon ki ek aisi basti hai

jo bhaarat ke bhole-bhaale insanon ko Dasti hai

un se bach kar chalna baba ye qatil zahrile hain

surat ke mohan hain bhitar se sab nile pile hain

shaida hun aazadi ka aazad-nagar mein Dera hai

kya batlaun mere bhayya kaun jahan mein mera hai

wo mera jo aazadi ki zulfon ka diwana hai

wo mera jo sham-e-watan ka shaidai parwana hai

wo mera jo maut ke aage be-jigari se tanta hai

wo mera jo aap na ho kuchh jis ki sab kuchh janta hai

wo mera jo hanste hanste phansi par chaDh jata hai

wo mera jo maut se bhi do chaar qadam baDh jata hai

aazadi ke talib sun le maut hi meri manzil hai

tu duniya ka ban sakta hai mera banna mushkil hai