aazadon ka git

mere din sairāb hue haiñ

nīndeñ ghor samundar jaisī

merī aañkh se lipTī haiñ

sub.h kī saa.at āzādoñ kā giit banī hai

saath chalī hai sayyāhoñ ke raste par

maiñ ek savār

sadā ke rath par baiTh ke jā.ūñ

sūraj-mukhī ke jalse meñ

baat karūñ tyauhāroñ kī

jo mere vasl ke darvāzoñ tak aa pahuñche haiñ

merī umr ke khaliyānoñ meñ

jin kī fasleñ na.e nisāb se utrī haiñ

baat karūñ us nisbat kī

jo phuul utarte mausam kī poshāk meñ aa.ī

tere dil meñ mere dil meñ

kaise apnī bhāshā se maiñ shahad banā.ūñ

kaise duudh kashīd karūñ

un bātoñ se jo sab kī jānī-būjhī haiñ

mere din sairāb hue haiñ

jaise sūraj aur kabūtar uḌ jaate haiñ

apne apne Darboñ se

jaise paanī bah jaatā hai dariyāoñ ke āñgan se

aise hī mere din kyā ma.alūm?

kahāñ tak jaa.eñ

kin rishtoñ meñ jāgnā chāheñ

mere din sairab hue hain

ninden ghor samundar jaisi

meri aankh se lipTi hain

subh ki saat aazadon ka git bani hai

sath chali hai sayyahon ke raste par

main ek sawar

sada ke rath par baiTh ke jaun

suraj-mukhi ke jalse mein

baat karun tyauhaaron ki

jo mere wasl ke darwazon tak aa pahunche hain

meri umr ke khaliyanon mein

jin ki faslen nae nisab se utri hain

baat karun us nisbat ki

jo phul utarte mausam ki poshak mein aai

tere dil mein mere dil mein

kaise apni bhasha se main shahad banaun

kaise dudh kashid karun

un baaton se jo sab ki jaani-bujhi hain

mere din sairab hue hain

jaise suraj aur kabutar uD jate hain

apne apne Darbon se

jaise pani bah jata hai dariyaon ke aangan se

aise hi mere din kya malum?

kahan tak jaen

kin rishton mein jagna chahen