aazmaish shart thi

zinda rahnā siikh kar bhī maiñ ne shāyad

zindagī ko durd-e-tah tak

pī ke jiine kī kabhī koshish nahīñ kii!

pyaas thī paanī nahīñ thā

sabr se shukr-o-razā ke band hujroñ meñ bañdhā

baiThā rahā aur halq meñ jab pyaas ke kāñTe chubhe to

sah gayā maiñ!

mere ghar vāloñ ne, mere biivī bachchoñ ne bhī

jalte hoñT sī kar pyaas ke kāñToñ ko sahne

sabr se shukr-o-razā ke band hujroñ meñ

taḌapne kā sabaq sīkhā mujhī se

ye sarāsar buz-dilī thii, un se dhokā thā

ki maiñ ne ḳhud ko pahchānā nahīñ thaa!

maiñ bhī muusā kī tarah

ġhusse meñ apnī āstīnoñ ko chaḌhātā

aur asā kī ek kaarī choT se

chaTTān ke TukḌe agar kartā

to shāyad bāzyābī ke amal meñ mujh pe khultā

rahbarī kā fan nubuvvat kā karishma

pyaas se halkān logoñ ke liye paanī kā chashma

āzmā.ish shart thī

maiñ ne kabhī puurī nahīñ kī

zinda rahna sikh kar bhi main ne shayad

zindagi ko durd-e-tah tak

pi ke jine ki kabhi koshish nahin ki!

pyas thi pani nahin tha

sabr se shukr-o-raza ke band hujron mein bandha

baiTha raha aur halq mein jab pyas ke kanTe chubhe to

sah gaya main!

mere ghar walon ne, mere biwi bachchon ne bhi

jalte honT si kar pyas ke kanTon ko sahne

sabr se shukr-o-raza ke band hujron mein

taDapne ka sabaq sikha mujhi se

ye sarasar buz-dili thi, un se dhoka tha

ki main ne KHud ko pahchana nahin tha!

main bhi musa ki tarah

ghusse mein apni aastinon ko chaDhata

aur asa ki ek kari choT se

chaTTan ke TukDe agar karta

to shayad bazyabi ke amal mein mujh pe khulta

rahbari ka fan nubuwwat ka karishma

pyas se halkan logon ke liye pani ka chashma

aazmaish shart thi

main ne kabhi puri nahin ki