ab bhi raushan hain

ab bhī raushan haiñ vahī dast hinā-ālūda

reg-e-sahrā hai na qadmoñ ke nishāñ baaqī haiñ

ḳhushk ashkoñ kī nadī ḳhuun kī Thahrī huī dhaar

bhūle-bisre hue lamhāt ke sūkhe hue ḳhaar

haath uThā.e hue aflāk kī jānib ashjār

kāmrānī hī kī gintī na hazīmat kā shumār

sirf ik dard kā jañgal hai faqat hū kā dayār

jab guzartī hai magar ḳhvāboñ ke vīrāne se

ashk-ālūda tabassum ke charāġhoñ kī qatār

jagmagā uThte haiñ gesū-e-sabā-ālūda

Toliyāñ aatī haiñ nau-umr tamannāoñ kī

dasht-e-be-rañg-e-ḳhamoshī meñ machātī huī shor

phuul māthe se baraste haiñ nazar se taare

ek ik gaam pe jaadū ke mahl bante haiñ

naddiyāñ bahtī haiñ āñchal se havā chaltī hai

pattiyāñ hañstī haiñ uḌtā hai kiran kā sonā

aisā lagtā hai ki be-rahm nahīñ hai duniyā

aisā lagtā hai ki be-zulm zamāne ke haiñ haath

bevafā.ī bhī ho jis tarah vafā-ālūda

aur phir shāḳhoñ se talvāreñ baras paḌtī haiñ

jabr jaag uThtā hai saffākī javāñ hotī hai

saa.e jo sabz the paḌ jaate haiñ pal bhar meñ siyāh

aur har moḌ pe ifrītoñ kā hotā hai gumāñ

koī bhī raah ho maqtal kī taraf muḌtī hai

dil meñ ḳhanjar ke utarne kī sadā aatī hai

tīrgī ḳhuuñ ke ujāle meñ nahā jaatī hai

shām-e-ġham hotī hai namnāk o ziyā-ālūda

yahī mazlūmoñ kī jiit aur yahī zālim kī shikast

ki tamannā.eñ salīboñ se utar aatī haiñ

apnī qabroñ se nikaltī haiñ masīhā ban kar

qatl-gāhoñ se vo uThtī haiñ duāoñ kī tarah

dasht o dariyā se guzartī haiñ havāoñ kī tarah

mohr jab lagtī hai hoñToñ pe zabāñ par taale

qaid jab hotī hai siine meñ diloñ kī dhaḌkan

ruuh chīḳh uThtī hai hilte haiñ shajar aur hajar

ḳhāmushī hotī hai kuchh aur navā-ālūda

sar-kashī DhūñDhtī hai zauq-e-gunahgārī ko

ḳhud se sharminda nahīñ auroñ se sharminda nahīñ

ye mirā dil ki hai māsūm o ḳhatā-ālūd

ab bhi raushan hain wahi dast hina-aluda

reg-e-sahra hai na qadmon ke nishan baqi hain

KHushk ashkon ki nadi KHun ki Thahri hui dhaar

bhule-bisre hue lamhat ke sukhe hue KHar

hath uThae hue aflak ki jaanib ashjar

kaamrani hi ki ginti na hazimat ka shumar

sirf ek dard ka jangal hai faqat hu ka dayar

jab guzarti hai magar KHwabon ke virane se

ashk-aluda tabassum ke charaghon ki qatar

jagmaga uThte hain gesu-e-saba-aluda

Toliyan aati hain nau-umr tamannaon ki

dasht-e-be-rang-e-KHamoshi mein machati hui shor

phul mathe se baraste hain nazar se tare

ek ek gam pe jadu ke mahl bante hain

naddiyan bahti hain aanchal se hawa chalti hai

pattiyan hansti hain uDta hai kiran ka sona

aisa lagta hai ki be-rahm nahin hai duniya

aisa lagta hai ki be-zulm zamane ke hain hath

bewafai bhi ho jis tarah wafa-aluda

aur phir shaKHon se talwaren baras paDti hain

jabr jag uThta hai saffaki jawan hoti hai

sae jo sabz the paD jate hain pal bhar mein siyah

aur har moD pe ifriton ka hota hai guman

koi bhi rah ho maqtal ki taraf muDti hai

dil mein KHanjar ke utarne ki sada aati hai

tirgi KHun ke ujale mein naha jati hai

sham-e-gham hoti hai namnak o ziya-aluda

yahi mazlumon ki jit aur yahi zalim ki shikast

ki tamannaen salibon se utar aati hain

apni qabron se nikalti hain masiha ban kar

qatl-gahon se wo uThti hain duaon ki tarah

dasht o dariya se guzarti hain hawaon ki tarah

mohr jab lagti hai honTon pe zaban par tale

qaid jab hoti hai sine mein dilon ki dhaDkan

ruh chiKH uThti hai hilte hain shajar aur hajar

KHamushi hoti hai kuchh aur nawa-aluda

sar-kashi DhunDhti hai zauq-e-gunahgari ko

KHud se sharminda nahin auron se sharminda nahin

ye mera dil ki hai masum o KHata-alud