ab dhup chaDhi diwaron par

ab vaqt-e-safar aa pahuñchā hai aa mil baiTheñ do-chār ghaḌī

jab pahle-pahal tum aa.e the āġhāz-e-sahar kā mela thā

kuchh kirneñ maddham maddham thiiñ kuchh ujlā ujlā dhuñdlakā thā

kuchh aisī umañgeñ thiiñ dil meñ

jo sarkash bhī ma.asūm bhī thiiñ

kuchh hastī boltī nazreñ thiiñ

jo shoḳh bhī be-mafhum bhī thiiñ

sūraj kī ubhartī kirneñ bhī yuuñ khel rahī thiiñ pahāḌoñ par

jis tarah havā añgāroñ par

nazreñ thiiñ mirī kohsāroñ par

phir dhuup chaḌhī mausam badlā

hālāt kī gardish tez huī

bāhar kī fazā haijānī thī

andar ke talātum ḳhez huī

kuchh aisī balā kī shiddat se Takrāo huā tūfānoñ kā

jo qadreñ thiiñ pāmāl huiiñ

jo ḳhvāb the chaknā-chūr hue

chand ek lamhe haañ lekin

fardā ke jo ḳhadd-o-ḳhāl bane

jo haal se istiqbāl bane

kuchh yādeñ jī kā vabāl huiiñ

kuchh zaḳhm ki jo nāsūr bane

kuchh ashk jo ġhālib aa ke rahe tūfān ke sarkash dhāroñ par

tūfāñ ke thapeḌoñ meñ bhī kabhī

jab muḌ ke dekhā kināroñ par

paañv the anā kī rakāboñ meñ nazreñ thiiñ mirī kohsāroñ par

ab din kā mela ḳhatm huā

ab dhuup chaḌhī dīvāroñ par

ab añdhiyāroñ kā mela hai ġhāroñ shahroñ kohsāroñ par

ab raakh chaḌhī añgāroñ par

ab vaqt-e-safar aa pahuñchā hai aa mil baiTheñ do-chār ghaḌī

ab waqt-e-safar aa pahuncha hai aa mil baiThen do-chaar ghaDi

jab pahle-pahal tum aae the aaghaz-e-sahar ka mela tha

kuchh kirnen maddham maddham thin kuchh ujla ujla dhundlaka tha

kuchh aisi umangen thin dil mein

jo sarkash bhi masum bhi thin

kuchh hasti bolti nazren thin

jo shoKH bhi be-mafhum bhi thin

suraj ki ubharti kirnen bhi yun khel rahi thin pahaDon par

jis tarah hawa angaron par

nazren thin meri kohsaron par

phir dhup chaDhi mausam badla

haalat ki gardish tez hui

bahar ki faza haijaani thi

andar ke talatum KHez hui

kuchh aisi bala ki shiddat se Takrao hua tufanon ka

jo qadren thin pamal huin

jo KHwab the chakna-chur hue

chand ek lamhe han lekin

farda ke jo KHadd-o-KHal bane

jo haal se istiqbaal bane

kuchh yaaden ji ka wabaal huin

kuchh zaKHm ki jo nasur bane

kuchh ashk jo ghaalib aa ke rahe tufan ke sarkash dhaaron par

tufan ke thapeDon mein bhi kabhi

jab muD ke dekha kinaron par

panw the ana ki rakabon mein nazren thin meri kohsaron par

ab din ka mela KHatm hua

ab dhup chaDhi diwaron par

ab andhiyaron ka mela hai ghaaron shahron kohsaron par

ab rakh chaDhi angaron par

ab waqt-e-safar aa pahuncha hai aa mil baiThen do-chaar ghaDi