ab to kuchh aisa lagta hai

ab to kuchh aisā lagtā hai

saarā jag mujh se chhoTā hai

āñkheñ bhī mirī bojhal bojhal

shānoñ par bhī kuchh rakkhā hai

kātib-e-vaqt ne jaate jaate

chehre par kuchh likh sā diyā hai

ā.īne meñ chehra khole

dekh rahī huuñ kyā likhkhā hai

likhkhā hai tire ruup kā haala

aur kisī ke gird sajā hai

likhkhā hai zulfoñ kā do-shāla

aur kisī ne oḌh liyā hai

likhkhā hai āñkhoñ kā piyāla

kahīñ kahīñ se TuuT rahā hai

paḌh kar mus.haf-e-ruḳh kī ibārat

dil ko itmīnān huā hai

ruuh talak sarshār hai merī

ā.īna hairān huā hai

us ko shāyad ilm nahīñ hai

merā dāman ab bhī bharā hai

jo rakhnā thā rakkhe hue huuñ

jo denā thā baañT diyā hai

ab to kuchh aisa lagta hai

sara jag mujh se chhoTa hai

aankhen bhi meri bojhal bojhal

shanon par bhi kuchh rakkha hai

katib-e-waqt ne jate jate

chehre par kuchh likh sa diya hai

aaine mein chehra khole

dekh rahi hun kya likhkha hai

likhkha hai tere rup ka haala

aur kisi ke gird saja hai

likhkha hai zulfon ka do-shaala

aur kisi ne oDh liya hai

likhkha hai aankhon ka piyala

kahin kahin se TuT raha hai

paDh kar mushaf-e-ruKH ki ibarat

dil ko itminan hua hai

ruh talak sarshaar hai meri

aaina hairan hua hai

us ko shayad ilm nahin hai

mera daman ab bhi bhara hai

jo rakhna tha rakkhe hue hun

jo dena tha banT diya hai