ababil ko samt do

suno

raat kahtī hai kyā

us ke lab tīrgī meñ khule

aur sadiyoñ kī dahshat siyāhī

bhayānak añdheroñ ke malbe ko

aane lagī jhurjhurī

chīḳhtī ik abābīl

ḳhālī darīchoñ shikasta sī mehrāb aur karb-ālūd sahme

hue taaq kī

kashmakash jheltī

dā.ere ḳhat musallas ke ġham khīñchtī phaḌphaḌāne lagī

dard kis

be-zabāñ ġham-zada sar-burīda mujassam kā hai

ḳhuun apnā sañbhālo zarā

hādse ke samundar meñ is saañs ko

ab uchhālo zarā

sāhilī pur-sukūñ pāniyoñ se ubhartī huī

rasmasāhaT ke pīchhe

chhupā kaun hai

lā-zamīñ lā-makāñ aur lā-jism

ye qatra qatra lahū

chāñd se ik jazīre ke ‘irfān meñ

rū-ba-sailāb hai

ābshāroñ se girtī huī

an-ginat barq sī be-tamāshā na.ī uñgliyoñ kī hañsī

in nigāhoñ meñ jab

gudgudī pherne aur sargoshiyoñ meñ har ik ''an-kahī''

rone ke liye

tum se milne ko betāb hai

to is raat ke kasmasāte hue hoñT kā

dil suno

aur abābīl ko samt do

suno

raat kahti hai kya

us ke lab tirgi mein khule

aur sadiyon ki dahshat siyahi

bhayanak andheron ke malbe ko

aane lagi jhurjhuri

chiKHti ek ababil

KHali darichon shikasta si mehrab aur karb-alud sahme

hue taq ki

kashmakash jhelti

daere KHat musallas ke gham khinchti phaDphaDane lagi

dard kis

be-zaban gham-zada sar-burida mujassam ka hai

KHun apna sanbhaalo zara

hadse ke samundar mein is sans ko

ab uchhaalo zara

sahili pur-sukun paniyon se ubharti hui

rasmasahaT ke pichhe

chhupa kaun hai

la-zamin la-makan aur la-jism

ye qatra qatra lahu

chand se ek jazire ke ‘irfan mein

ru-ba-sailab hai

aabshaaron se girti hui

an-ginat barq si be-tamasha nai ungliyon ki hansi

in nigahon mein jab

gudgudi pherne aur sargoshiyon mein har ek an-kahi

rone ke liye

tum se milne ko betab hai

to is raat ke kasmasate hue honT ka

dil suno

aur ababil ko samt do