ابابیل کو سمت دو

سنو

رات کہتی ہے کیا

اس کے لب تیرگی میں کھلے

اور صدیوں کی دہشت سیاہی

بھیانک اندھیروں کے ملبے کو

آنے لگی جھرجھری

چیختی اک ابابیل

خالی دریچوں شکستہ سی محراب اور کرب آلود سہمے

ہوئے طاق کی

کشمکش جھیلتی

دائرے خط مثلث کے غم کھینچتی پھڑپھڑانے لگی

درد کس

بے زباں غم زدہ سر بریدہ مجسم کا ہے

خون اپنا سنبھالو ذرا

حادثے کے سمندر میں اس سانس کو

اب اچھالو ذرا

ساحلی پر سکوں پانیوں سے ابھرتی ہوئی

رسمساہٹ کے پیچھے

چھپا کون ہے

لا زمیں لا مکاں اور لا جسم

یہ قطرہ قطرہ لہو

چاند سے اک جزیرے کے عرفان میں

رو‌ بہ سیلاب ہے

آبشاروں سے گرتی ہوئی

ان گنت برق سی بے تماشا نئی انگلیوں کی ہنسی

ان نگاہوں میں جب

گدگدی پھیرنے اور سرگوشیوں میں ہر اک ان کہی

رونے کے لئے

تم سے ملنے کو بیتاب ہے

تو اس رات کے کسمساتے ہوئے ہونٹ کا

دل سنو

اور ابابیل کو سمت دو