ابد گزیدہ

ابد گزیدہ

خزاں رسیدہ

بدن دریدہ

کہاں چلا ہے تو سر بریدہ

اجل کی بارات جا رہی ہے

یہ کون ڈمرو بجا رہا ہے

فنا کی دیوی نئی وباؤں کی تازہ فصلیں اگا رہی ہے

عجب گھڑی ہے

عدم کی بستی میں بھیرویں گائی جا رہی ہے

مگر تحیر کے آسمانوں میں اک ستارہ

طلسم ہستی کے خشک ہوتے سمندروں سے

بس ایک قطرہ

ابد کی گہری سیاہیوں میں

وہ ایک بے جسم

روشنی کا حقیر ذرہ

وہ ایک ذرہ کہ جس کے دم سے دمک اٹھیں گی

نجانے کتنی ہی کہکشائیں

ورید جاں سے ٹپکنے والی امید کا بے مثال جوہر

عجب کرشمے دکھا رہا ہے

کئی فرشتے تباہیوں کے

اجل کے کتنے ہی دیوتا

اپنی حیرت کی چلمنوں سے نکل کے باہر

یہ دم بخود اس سے پوچھتے ہیں

تو اپنے جوتوں سمیت معبد میں کیسے پہنچا