abhi har dastan adhuri hai

abhī har dāstāñ adhūrī hai

abhī har rāsta hai nā-hamvār

ab ke har mashġhala hai nā-kāfī

is ko manzil na samajhnā ai dil

ye vo maqām hai

jis ko āġhāz-e-safar hī kahiye

ye ki anjām-e-jāñ-kushā.ī hai

ab ki chalte hī chale jaanā hai

ab ke tanhā to tum nahīñ hoge

ab ke ai dil baḌe sahāre haiñ

ham-safar āgahī juuñ ham-rāh

talḳhiyāñ talḳh tajrabāt

mash'aleñ raushan

ab ke har sang-e-mīl

tum ko sadā.eñ degā

ab ki chalnā hai tumheñ

justujū meñ manzil kī

vahī manzil ki hai

talāsh jis kī sadiyoñ se

sar-e-ādam ko

qalb-o-jāñ ko rūh-e-insāñ ko

ab ki jo chal hī paḌe ho

to ye ḳhayāl rahe

zindagī rāste badaltī hai

manzileñ aatī jaatī rahtī haiñ

ek manzil se dūsrī manzil

phir kisī dūsrī manzil kī talāsh

ye safar ḳhatm hī nahīñ hotā

zindagī ḳhatm ho to ho jaa.e

justujū ḳhatm hī nahīñ hotī

abhī har dāstāñ adhūrī hai

abhi har dastan adhuri hai

abhi har rasta hai na-hamwar

ab ke har mashghala hai na-kafi

is ko manzil na samajhna ai dil

ye wo maqam hai

jis ko aaghaz-e-safar hi kahiye

ye ki anjam-e-jaan-kushai hai

ab ki chalte hi chale jaana hai

ab ke tanha to tum nahin hoge

ab ke ai dil baDe sahaare hain

ham-safar aagahi jun ham-rah

talKHiyan talKH tajrabaat

mash'alen raushan

ab ke har sang-e-mil

tum ko sadaen dega

ab ki chalna hai tumhein

justuju mein manzil ki

wahi manzil ki hai

talash jis ki sadiyon se

sar-e-adam ko

qalb-o-jaan ko ruh-e-insan ko

ab ki jo chal hi paDe ho

to ye KHayal rahe

zindagi raste badalti hai

manzilen aati jati rahti hain

ek manzil se dusri manzil

phir kisi dusri manzil ki talash

ye safar KHatm hi nahin hota

zindagi KHatm ho to ho jae

justuju KHatm hi nahin hoti

abhi har dastan adhuri hai