abhi kuchh aur

abhī kuchh aur sāñseñ rah ga.ī haiñ

abhī kuchh aur risāloñ tak mujhe ginnā hai un ko

abhī kuchh qarz hai mujh par sabhī kā

abhī kuchh aur ḳhushiyāñ bāñTnī haiñ

abhī kuchh qahqahoñ ko naġhmagī ḳhairāt karnī hai

guhar karnā hai lafzoñ ko

zamīn-e-harf-o-ma.anī se abhī kuchh ḳhaar chunñe haiñ

ḳhayāloñ ko dhanak banñā hai shāyad

na.e ḳhvāboñ ko sūrat baḳhshnī hai

abhī zarroñ ko vus.at baḳhshnī hai

hare mausam se ḳhushbū kasb karnī hai

lahū denā hai saare zard pattoñ aur phūloñ ko

havāoñ ko subuk-gāmī sikhānī hai

añdheroñ ko sitāroñ ko abhī mash.al dikhānī hai

abhī bādal ko bārish daan denī hai

chamakte chāñd ko vīrān māthe par sajānā hai

kahīñ mehñdī kā buuTā aur kahīñ par niim ugānā hai

mire allah samajh meñ aa gayā mere

abhī kuchh aur din jiinā hai mujh ko

abhī duniyā ko hai merī zarūrat

abhi kuchh aur sansen rah gai hain

abhi kuchh aur risalon tak mujhe ginna hai un ko

abhi kuchh qarz hai mujh par sabhi ka

abhi kuchh aur KHushiyan banTni hain

abhi kuchh qahqahon ko naghmagi KHairaat karni hai

guhar karna hai lafzon ko

zamin-e-harf-o-mani se abhi kuchh KHar chunne hain

KHayalon ko dhanak banna hai shayad

nae KHwabon ko surat baKHshni hai

abhi zarron ko wusat baKHshni hai

hare mausam se KHushbu kasb karni hai

lahu dena hai sare zard patton aur phulon ko

hawaon ko subuk-gami sikhani hai

andheron ko sitaron ko abhi mashal dikhani hai

abhi baadal ko barish dan deni hai

chamakte chand ko viran mathe par sajaana hai

kahin mehndi ka buTa aur kahin par nim ugana hai

mere allah samajh mein aa gaya mere

abhi kuchh aur din jina hai mujh ko

abhi duniya ko hai meri zarurat