abhi kuchh aur Thahar

mujhe ye shaam bhī tujh sī hasīn lagtī hai

guzartī shaam ke sandal se āsmān pe dekh

palaT ke jaane se pahle sunahre sūraj ne

ghane daraḳht pe māthā Tikā diyā apnā

mire bhī kāñdhe pe tū sar Tikā ke baiTh zarā

kuchh aur der mire paas aa ke baiTh zarā

kuchh aur der ki sargoshiyoñ kī āvāzeñ

dhaḌakte dil kī sadā meñ samā.e jaatī haiñ

mire laboñ pe daraḳhshāñ hai tere naam kī lau

tire laboñ se laraztī sadā Dhalaktī hai

samā.atoñ meñ tire lafz ghul rahe haiñ Thahar

sukūt-e-zīst ke sab daaġh dhul rahe haiñ Thahar

zarā Thahar tirī āñkhoñ meñ saaf likkhā hai

nashāt-e-vasl pe bhārī hai dard ruḳhsat kā

ġhurūb-e-shām kā manzar hai aur tirī āñkheñ

zarā ḳhumār meñ bahkī haiñ kuchh thakān se chuur

tirī nazar hai ki goyā nigāh-e-sāqī hai

abhī na jā mujhe mad.hosh honā baaqī hai

zarā sī der meñ ye shaam lauT jā.egī

tujhe bhī ghar kī pareshāniyāñ bulā leñgī

mujhe bhī shahr kī galiyoñ kī ḳhaak chhānñī hai

par is se pahle zarā der ruk tujhe chhū luuñ

maiñ apnī nazroñ se hāthoñ kā kaam luuñ ruk jā

maiñ tere aks ko āñkhoñ meñ thaam luuñ ruk jā

mujhe ye sham bhi tujh si hasin lagti hai

guzarti sham ke sandal se aasman pe dekh

palaT ke jaane se pahle sunahre suraj ne

ghane daraKHt pe matha Tika diya apna

mere bhi kandhe pe tu sar Tika ke baiTh zara

kuchh aur der mere pas aa ke baiTh zara

kuchh aur der ki sargoshiyon ki aawazen

dhaDakte dil ki sada mein samae jati hain

mere labon pe daraKHshan hai tere nam ki lau

tere labon se larazti sada Dhalakti hai

samaaton mein tere lafz ghul rahe hain Thahar

sukut-e-zist ke sab dagh dhul rahe hain Thahar

zara Thahar teri aankhon mein saf likkha hai

nashat-e-wasl pe bhaari hai dard ruKHsat ka

ghurub-e-sham ka manzar hai aur teri aankhen

zara KHumar mein bahki hain kuchh thakan se chur

teri nazar hai ki goya nigah-e-saqi hai

abhi na ja mujhe madhosh hona baqi hai

zara si der mein ye sham lauT jaegi

tujhe bhi ghar ki pareshaniyan bula lengi

mujhe bhi shahr ki galiyon ki KHak chhanni hai

par is se pahle zara der ruk tujhe chhu lun

main apni nazron se hathon ka kaam lun ruk ja

main tere aks ko aankhon mein tham lun ruk ja